“پارتی ئازادی و دیموکراسیی گەلان” (دەم پارتی) کاردانەوەی توندی بەرانبەر بە سزادانی عەبدوڵڵا زەیدان، هاوسەرۆکی گەورە شارەوانیی وان نیشاندا و ڕایگەیاند، ئەم بڕیارە هەوڵێکە بۆ تێکدانی پڕۆسەی ئاشتی لە تورکیا.
“توڵای هاتیمئۆغڵولاری”، هاوسەرۆکی دەم پارتی لە لێدوانێکیدا ئاماژەی بەوەدا، لەدوای داواکاری دەوڵەت باخچەلی بۆ زیندووکردنەوەی برایەتی تورک-کورد، گفتوگۆکان لەگەڵ زیندانی ئیمرالی دەستی پێکردووە و بۆ چارەسەرکردنی پرسی کورد بە شێوازی ئاشتیانە و دیموکراسییانە باس لە پڕۆسەیەکی دیالۆگ کراوە.
هاتیمئۆغڵولاری ڕایگەیاند: “ئەمڕۆ بە سزادانی هاوسەرۆکانی شارەوانی و دانانی قەییووم لە شوێنیان، پڕۆسەی دیالۆگ بۆ ئاشتی دەشێوێندرێت. ئێمە وەک دەم پارتی ئەمە قبوڵ ناکەین و گەلی کورد و خەڵکی تورکیا لەگەڵ درێژەدان بە پڕۆسەی ئاشتی و دیالۆگەکان لەسەر ئەم پرسەن.”
ئەم لێدوانەی دەم پارتی لە کاتێکدایە دادگای تورکیا عەبدوڵڵا زەیدانی بە سێ ساڵ و نۆ مانگ زیندانی سزادا، ئەمەش کاردانەوەی توندی لێکەوتەوە و بە هەوڵێک بۆ تێکدانی هەوڵەکانی ئاشتی لە قەڵەم دەدرێت. دەم پارتی، جەخت دەکاتەوە ئەوان بە هەموو شێوەیەک دژی ئەو هەوڵانە دەوەستنەوە و لە تورکیا لەگەڵ چارەسەری ئاشتیانەی پرسی کوردن.
هەواڵی پێشوو