گوتەبێژی لیژنەی تەندروستیی پەرلەمانی ئێران هۆشداریی دا نەخۆشانی تالاسیمیا لە پارێزگای سیستان و بەلووچستان تووشی ڤایرۆسی هیپاتیتی سی دەبن، لە کاتێکدا کورتهێنانێکی بەرچاو لە دەرزیی پێویست بۆ چارەسەری ئەم نەخۆشییە هەیە.
سەلمان ئیسحاقی، گوتەبێژی لیژنەی تەندروستیی پەرلەمانی ئێران ڕایگەیاند: ئێران ساڵانە بۆ چارەسەری تالاسیمیا پێویستی بە ١٠ ملیۆن دەرزی هەیە، بەڵام تەنها ١.٧ ملیۆن دەرزی هاوردە دەکرێت و ٣ ملیۆن دەرزی لە نیوخۆ بەرهەم دەهێنرێت. ئەمەش واتە سیستەمی تەندروستیی ئێران ساڵانە لەگەڵ کورتهێنانی ٥ ملیۆن دەرزی بەرەوڕوو دەبێتەوە و دەکاتە ٥٠٪ی پێداویستی سەرجەم وڵات.
بەپێی ڕاپۆرتە فەرمییەکان، هەر نەخۆشێکی تالاسیمیا لە ئێران دەبێت مانگانە بڕی ١٥ ملیۆن تمەن بۆ دابینکردنی دەرمانەکانی خۆی خەرج بکات، لە کاتێکدا کورتهێنانی دەرزی و دەرمانیش بەردەوامە، بارگرانییەکی داراییە لەسەر نەخۆشان.
