کۆمپانیای بلو ئۆریجین (Blue Origin)، کە خاوەنەکەی جێف بێزۆسی ملیاردێری ئەمریکاییە، یەکەم گەشتی ئاسمانی بە سەرنشینی تەواو ئافرەتانە لە مێژوودا ڕێکدەخات. لەم گەشتە مێژووییەدا کە لەلایەن کۆمپانیای بۆشایی ئاسمانیی بێزۆسەوە ڕێکخراوە، شەش ئافرەتی ناسراو بەشداری دەکەن.
گەشتەکە لە بنکەیەکی ڕۆژئاوای تێکساسەوە ئەنجام دەدرێت و کەیتی پێری، گۆرانیبێژی بەناوبانگی ئەمریکایی، لەلایەن پێنج ئافرەتی دیکەوە هاوڕێیەتی دەکرێت، لەوانە لۆرن سانچێز، دەستگیرانی جێف بێزۆس.
مووشەکی “نیو شێپەرد”ی بلو ئۆریجین بە شێوەیەکی ستوونی و تەواو ئۆتۆماتیکی هەڵدەدرێت. لە کاتی فڕیندا، کەپسولی هەڵگری سەرنشینەکان جیا دەبێتەوە و پاشان بە یارمەتیی پەڕەشووت و سیستەمی تایبەتی مووشەکی، بە نەرمی لەسەر زەوی دەنیشێتەوە.
ئەمە یەکەم گەشتی ئاسمانیی مێژووە بە سەرنشینی تەواو ئافرەتانە، هەروەها یازدەهەمین گەشتی سەرنشینداری ژێرمەداریی (suborbital) کۆمپانیای بلو ئۆریجین دەبێت. کۆمپانیاکەی جێف بێزۆس چەندین ساڵە ئەم ئەزموونانەی گەشتیاریی بۆشایی ئاسمان پێشکەش دەکات.
