لە کاتێکدا دانوستانەکانی نێوان ئێران و ئەمریکا بەردەوامن و ئێران جەخت لەسەر لابردنی سزاکان وەک تەوەرێکی سەرەکی دەکات، وەزارەتی گەنجینەی ئەمریکا سزای نوێی بەسەر سەرمایەدارێکی ئێرانی بە ناوی سەید ئەسەدوڵڵا ئیمام جومعە و تۆڕی کۆمپانیاکانی ڕاگەیاندووە کە لە بواری بازرگانیی گازی شل (ئێڵپیجی) چالاکن.
بەپێی ڕاگەیەنراوێکی وەزارەتی گەنجینەی ئەمریکا، ئەسەدوڵڵا ئیمام جومعە و کۆمپانیاکانی بە شێوەیەکی سەرەکی سزاکانی ئەمریکایان پێشێل کردووە، لەوانە بارکردنی هەزاران بارە گازی شل، تەنانەت لە خاکی ئەمریکاوە. سکۆت بێسێنت، وەزیری گەنجینەی ئەمریکا، دەڵێت داهاتی ئەم بازرگانییە بۆ سەرمایەگوزاری لە بەرنامەی ئەتۆمی و مووشەکی ئێران، هەروەها پشتگیری لە گرووپە بەوەکالەتەکانی وەک حزبوڵڵای لوبنان، حووسییەکانی یەمەن، و حەماس خەرج کراوە.
ئەم هەنگاوەی ئەمریکا لە کاتێکدا دایە، ئێران بۆ پێشخستنی گفتوگۆکان داوای لادانی سزاکان دەکات، بەڵام واشنتن بۆ سنووردارکردنی چالاکییەکانی ئێران لە ناوچەکە، جەخت لەسەر بەردەوامیی فشارەکان دەکات. ئەم سزایانە دەتوانن کەرگەیەکی نوێ لە گرژییەکان لە نێوان هەردوو وڵاتدا دروست بکەن، لە کاتێکدا ناوچەکە پێشتر لەژێر کاریگەریی شەڕی غەززە و پەرچەکردارییەکانی گرووپە بەوەکالەتەکانەدایە.
