لە هێرشێکی چەکداریی نوێدا کە لەلایەن گرووپە چەکدارەکانەوە لە پارێزگای سوەیدا ئەنجام درا، کارمەندێکی هێزەکانی ئاسایشی ناوخۆی سووریا کوژرا و چەند کەسێکی دیکە بریندار بوون.
سەرچاوەیەکی ئەمنی لە لێدوانێکدا بۆ کەناڵی “ئیخبارییەی سووریا” کە ئەمڕۆ یەکشەممە بڵاو کرایەوە، ڕایگەیاند: “گرووپە یاساشکێنەکان بە پێشێلکردنی ڕێککەوتنی ئاگربەست لە سوەیدا، هێرشیان کردووەتە سەر هێزەکانی ئاسایشی ناوخۆ و چەندین گوندیان لە دەوروبەری پارێزگاکە تۆپباران کردووە.”
هەروەها گوتی: “ئەم پێشێلکارییە بەردەوامانەی ئاگربەست لەلایەن ئەو گرووپانەوە بووەتە هۆی کوژرانی کارمەندێکی ئاسایشی ناوخۆ و برینداربوونی چەند کەسێکی دیکە.”
سەرچاوەکە جەختی کردەوە “ئەم هێرشانە هاوکاتە لەگەڵ هەوڵەکانی حکوومەت بۆ گەڕاندنەوەی سەقامگیری و ئارامی بۆ پارێزگای سوەیدا و دابینکردنی زەمینە بۆ گەڕانەوەی خزمەتگوزارییەکان و ژیانی ئاسایی لەو ناوچەیە.”
ئاژانسی هەواڵی فەرمیی سووریا “سانا” ڕۆژی شەممە ڕایگەیاند کاروانێک کە لە ٢٨٦ کەس پێکهاتبوو، زۆربەیان ژن و منداڵ، لە پارێزگای سوەیداوە بۆ شاری بوسرا شامی دراوسێی لە پارێزگای دەرعا لە باشووری وڵات گوازراونەتەوە.
پارێزگای سوەیدا لە ١٩ی تەممووزی ڕابردووەوە ئاگربەستێکی بەخۆیەوە بینیوە کە دوای پێکدادانە چەکدارییەکان و کوژران و برینداربوونی چەندین کەس ڕاگەیەندرا. حکوومەتی نوێی سووریا بۆ کۆنترۆڵکردنی قەیرانەکە تا ئێستا چوار ڕێککەوتنی ئاگربەستی لە سوەیدا ڕاگەیاندووە کە دوایینیان لە ١٩ی تەممووزی ڕابردوو بوو.
هەواڵی پێشوو