پارتی بزووتنەوەی نەتەوەپەرستی تورکیا (MHP)، هاوبەشی دەسەڵات، ڕایدەگەیەنێت، لە پرۆسەی ئاشتیدا هیچ جۆرە سازش و مامەڵەیەک لە ئارادا نییە و کۆمیسیۆنێک دەتوانێت یاسایەک بۆ ئەو ئەندامانەی پەکەکە دەربکات کە تاوانیان لەسەر نییە. هاوکات جەخت دەکاتەوە، بە پڕۆژەی “تورکیای بێ تیرۆر” پارێزگاری لە یەکپارچەیی خاکی سووریا و عێراقیش دەکەن.
لەلایەکی دیکەوە، موراد کاراییلان، فەرماندەی هێزەکانی پاراستنی گەل (HPG)، ڕایگەیاند، بێمتمانەیی لەنێوان لایەنەکاندا هەیە و تا عەبدوڵڵا ئۆجەلان بە تەواوی ئازاد نەکرێت، هێزەکانیان متمانە بە دەسەڵاتی تورکیا ناکەن.
MHP، هاوشێوەی دەم پارتی و ئاک پارتی، بەمەبەستی خستنەڕووی هەڵوێستی خۆی لەسەر پرۆسەی ئاشتی، دەستی بە کۆبوونەوەی جەماوەری کردووە. سامیح یاڵچن، جێگری سەرۆکی گشتیی MHP، لە کۆبوونەوەیەکدا لە شاری ئەرزەڕۆم گوتی: “کاتێک پڕۆژەی ‘تورکیای بێ تیرۆر’ جێبەجێ دەکرێت، یەکێتی و سەروەریمان لاواز نابێت… ئەو کەسانەی لە ڕێکخراوی جوداخوازەوە تێوەنەگلاون لە کاری تاوانکاریدا، دەتوانن بەشدار بن و بۆ ئەمەش پێویست بە هەندێک هەموارکردنەوەی یاسایی هەیە.”
بەڵام موراد کاراییلان ڕەخنە لە دەسەڵاتی تورکیا دەگرێت و دەڵێت، بابەتەکە تەنها بە دانانی چەک سنووردار دەکاتەوە. کاراییلان گوتی: “مەراسیمی سووتاندنی چەک بە شێوەیەکی فەرمی و کرداری، کۆتاییهێنان بوو بە ستراتیژی خەباتی چەکداری لە بەرانبەر تورکیا. ئێستا پێویستە دەوڵەتی تورکیا هەنگاو بنێت و ڕێبەر ئۆجەلان بە تەواوی ئازاد بکات.”
کاراییلان هەروەها گوتی: “لەنێوان لایەنەکاندا گومان و بێمتمانەیی هەیە. ئەگەر دەوڵەت هەنگاو بنێت، پرۆسەی سووتاندنی چەک بەردەوام دەبێت، بەڵام ئەگەر پاشگەز بێتەوە، یاسا دەرنەکات و هێرش بکات، ئەوا ئێمەش بەرگری لە خۆمان دەکەین.”
سەبارەت بە دۆخی سووریا، کاراییلان گوتی: “لە سووریا دەستوور و یاسا و متمانە نییە، کەچی دەڵێن با هەسەدە چەک دابنێت. هێرشەکانی سەر عەلەوی و درووزییەکانمان بینی. هەسەدە لە ساڵانی پێشوو بەهێزترە و سیستمەکانی ژێرزەوی و ئاسمانیی پێشخستووە. هەسەدە هەڕەشە نییە بۆ سەر تورکیا، بەڵام ئەگەر تورکیا هێرش بکات، بەرگری لە خۆیان دەکەن و تورکیا هەرگیز سەرناکەوێت.”