ئێران دوای بڵاوکردنەوەی بەیاننامەیەکی هاوبەشی یەکێتیی ئەورووپا و ئەنجومەنی هاوکاریی کەنداو، باڵیۆزی چەند وڵاتێکی ئەورووپایی بانگ کرد. ئەم وڵاتانە سەبارەت بە خاوەندارێتیی سێ دوورگەکەی کەنداو و بەرنامە ئەتۆمییەکەی ئێران دوابوون. تاران ئەم هەڵوێستانەی بە “دەستێوەردانی ئاشکرا” لە کاروباری ناوخۆی خۆی وەسف کرد.
بە گوێرەی ئاژانسی هەواڵی ئیسنا، ئێران ڕۆژی چوارشەممە ڕایگەیاند، ژمارەیەک لە باڵیۆزانی وڵاتانی ئەورووپایی لە تاران بانگ کراون. بەیاننامەکە، کە دوای کۆبوونەوەیەک لە ڕۆژی دووشەممە لە کوێت بڵاو کرایەوە، ئێرانی بە “داگیرکردنی” دوورگەکانی تونبی گەورە، تونبی بچووک و ئەبوو مووسا تۆمەتبار کردبوو.
ئیماراتی یەکگرتووی عەرەبی ئیدیعای خاوەندارێتیی ئەم سێ دوڕگەیە دەکات کە دەکەونە دەروازەی گەرووی ستراتیژیی هورمزەوە؛ گەروویەک کە نزیکەی یەک لەسەر پێنجی نەوتی جیهانی پێدا تێدەپەڕێت. ئێران ئەم دوورگانە بە بەشێکی دانەبڕاوی خاکی خۆی دەزانێت.
بەپێی ڕاپۆرتی میدیاکانی ئێران، مەجید تەختڕەوانچی، جێگری وەزیری دەرەوەی ئێران، باڵیۆزە ئەورووپاییەکانی بۆ گەیاندنی “ناڕەزایەتیی توندی” تاران بەرانبەر بە پشتیوانیکردن لە “ئیدیعا بێ بنەماکانی” ئیمارات سەبارەت بە سەروەریی سێ دوورگەکە بانگ کردووە. لە ڕاپۆرتەکاندا، ناوی ڕەگەزنامەی باڵیۆزە بانگهێشتکراوەکان نەهێنراوە.
تەختڕەوانچی، وێڕای جەختکردنەوە لەسەر “سەروەریی بێ ئەملاوئەولای هەمیشەیی”ی ئێران بەسەر ئەم دوورگانەدا، “هەڵوێستی سیاسی و مەبەستداری” یەکێتیی ئەورووپای شەرمەزار کرد. ناوبراو هەروەها ئەو بەشانەی بەیاننامە هاوبەشەکەی بە “دەستێوەردانی ئاشکرا” لە کاروباری ئێراندا زانی کە باس لە سنووردارکردنی توانای مووشەکی و فڕۆکەی بێفڕۆکەوانی ئێران دەکەن و جەختی کردەوە “توانای مووشەکی، بەشێکە لە مافی زاتیی ئێران بۆ بەرگریکردن لە خۆی و گەرەنتیی سەقامگیری و ئاسایشی ناوچەیی دەکات.”
بەیاننامەکە هەروەها داوای لە ئێران کردبوو هاوکاریی تەواوی خۆی لەگەڵ ئاژانسی نێودەوڵەتیی وزەی ئەتۆمی دەست پێ بکاتەوە. ئێران دوای هێرشی ئیسرائیل و ئەمریکا بۆ سەر دامەزراوە ئەتۆمییەکانی، هاوکارییەکانی لەگەڵ ئەم دامەزراوە چاودێرییەی نەتەوە یەکگرتووەکان ڕاگرتووە.
تەختڕەوانچی لە وەڵامی ئەم بابەتەدا، بە ئاماژەدان بە “کەمتەرخەمیی” یەکێتیی ئەورووپا “لە جێبەجێکردنی ئەرکەکانی” بەپێی ڕێککەوتنی ئەتۆمی (بەرجام)، گوتی: “باشتر وایە یەکێتیی ئەورووپا لەجیاتیی دووبارەکردنەوەی ئیدیعای دووبارە و ناڕاست سەبارەت بە بەرنامە ئەتۆمییەکەی ئێران، وەڵامی کارە تێکدەرانەکانی خۆی بداتەوە.”
پێشتر، وەزارەتی دەرەوەی ئێران ڕایگەیاندبوو، لە دۆخی ئێستادا نیازی دەستپێکردنەوەی وتووێژەکانی لەگەڵ وڵاتانی ئەورووپایی سەبارەت بە بەرنامە ئەتۆمییەکەی نییە. وتووێژەکان لەم بارەیەوە دوای گەڕانەوەی سزاکانی نەتەوە یەکگرتووەکان بە دەستپێشخەریی فەڕەنسا، بەریتانیا و ئەڵمانیا لە ٢٧ی ئەیلوولدا، بە کردەوە ڕاگیراون.
