دۆناڵد ترامپ، سەرۆکی ویلایەتە یەکگرتووەکانی ئەمریکا، هۆشداریی دا کە ئەگەر ڕووسیا کۆتایی بە جەنگەکەی دژی ئۆکراینا نەهێنێت، ڕەنگە مووشەکە دوورهاوێژەکانی تاماهاوک بۆ کیێڤ بنێرێت. ترامپ گوتوویەتی کە ئەم بابەتە لەگەڵ ڤلادیمێر پوتین، سەرۆکی ڕووسیا، تاوتوێ دەکات.
ترامپ ڕۆژی یەکشەممە، ١٢ی تشرینی یەکەم، لە گفتوگۆیەکدا لەگەڵ ڕۆژنامەنووسان گوتوویەتی: “ئەگەر ڕووسیا کۆتایی بە جەنگەکە نەهێنێت، ڕەنگە تاماهاوکەکان بنێرین.”
ئەو جەختی لەوە کردەوە کە ویلایەتە یەکگرتووەکانی ئەمریکا ئەم مووشەکانە ڕاستەوخۆ بە ئۆکراینا نافروشێت، بەڵکوو ڕادەستی ناتۆیان دەکات بۆ ئەوەی ئەو هاوپەیمانێتییە بیگوازێتەوە بۆ ئۆکراینا. ترامپ زیادیشی کرد کە لە کۆتایی هەفتەدا دوو جار بە تەلەفۆن لەگەڵ ڤۆلۆدیمیر زێلێنسکی، سەرۆکی ئۆکراینا، قسەی کردووە.
ڕووسیا چەندین جار هۆشداریی لە بەرانبەر کارێکی لەم شێوەیە داوە. پوتین هەڕەشەی ئەوەی کردووە کە ئەم کارە “قۆناغێکی نوێی توندبوونەوەی کوالیتی”ی لەگەڵ خۆیدا دەهێنێت. زێلێنسکی جەختی لەوە کردووەتەوە کە ئۆکراینا ئەم مووشەکانە تەنها بۆ ئامانجە سەربازییەکان بەکار دەهێنێت و هاووڵاتییانی مەدەنیی ڕووسیا ناکاتە ئامانج.
مووشەکەکانی تاماهاوک، بەپێی مۆدێلەکانیان، مەودای نێوان ١٦٠٠ بۆ ٢٥٠٠ کیلۆمەتر دەبێت و دەتوانن ئامانجە دوورەکان بە وردییەکی زۆرەوە بکەنە ئامانج.
