ئەنجومەنی مافی مرۆڤی ڕێکخراوی نەتەوە یەکگرتووەکان ئەرکی ڕاسپیردراوی ئەو ئەنجومەنە بۆ کاروباری ئێرانی بۆ ماوەی یەک ساڵ درێژ کردەوە.
ئەنجومەنی مافی مرۆڤی ڕێکخراوی نەتەوە یەکگرتووەکان لە پێنجا و پێنجەمین کۆبوونەوەی خۆیدا هەروەها کار و چالاکییەکانی کۆمیتەی دۆزینەوەی ڕاستییەکانی سەبارەت بە سەرکوتی خۆپێشاندانەکانی شۆڕشی ژن-ژیان- ئازادیشی بۆ ماوەی ساڵێک درێژ کردەوە و بودجەی پێویستی بۆ چالاکییەکانی ئەم کۆمیتەیە پەسند کرد.
ڕەشنووسی بڕیارنامەی بەردەوامبوونی چالاکییەکانی ئەم کۆمیتەیە و هەروەها جاوید ڕەحمان، ڕاسپێردراوی تایبەتیی ڕێکخراوی نەتەوە یەکگرتووەکان بۆ کاروباری ئێران وڵاتانی ئەڵمانیا و ئەمریکا ئامادەیان کردبوو.
24 ئەندامی ئەنجومەنی مافی مرۆڤ لەگەڵ پەسند کردنی ئەم بڕیارنامەیە دابوون و لە بەرانبەریشدا هەشت ئەندام لە دژی بوون. پازدە ئەندامیش بە بێلایەنی دەنگیان دا.