دۆناڵد ترەمپ، سەرۆککۆماری ئەمریکا، دوای ئەوەی بەرپرسانی باڵای ئابووریی ئەمریکا و چین ڕۆژی یەکشەممە کۆتاییان بە گفتوگۆ دوو ڕۆژییەکانیان هێنا بۆ کەمکردنەوەی گرژییە بازرگانییەکان لە مالیزیا، متمانەی خۆی بە گەیشتن بە ڕێککەوتن لەگەڵ شی جین پینگ، سەرۆککۆماری چین، دەربڕی کە بڕیارە هەفتەی داهاتوو دیداری لەگەڵدا بکات.
سکۆت بێسنت، وەزیری خەزێنەی ئەمریکا و جەیمیسۆن گریر، نوێنەری بازرگانیی ئەمریکا، لە پەراوێزی لووتکەی ئاسێئان لە کوالالەمپور، بۆ پێنجەمین گەڕی گفتوگۆ ڕووبەڕووەکان لە مانگی ئایارەوە، دیداریان لەگەڵ هی لیفێنگ، جێگری سەرۆکوەزیرانی چین و لی چێنگگانگ، دانوستانکاری باڵای بازرگانیی پەکین، کرد.
بێسنت بە ڕۆژنامەنووسانی ڕاگەیاند: “پێموایە ئێمە چوارچێوەیەکی زۆر سەرکەوتوومان بۆ گفتوگۆ و ئاڵوگۆڕی بیروڕای سەرکردەکان [ی هەردوو وڵات] لە ڕۆژی پێنجشەممەدا هەیە.”
ترەمپ ڕۆژی یەکشەممە بۆ بەشداریکردن لە لووتکەی یەکێتیی وڵاتانی باشووری ڕۆژهەڵاتی ئاسیا گەیشتە مالیزیا. ئەمە یەکەم وێستگەیەتی لە گەشتێکی پێنج ڕۆژیی ئاسیاییدا و چاوەڕوان دەکرێت لە ٣٠ی تشرینی یەکەمدا لە کۆریای باشوور دیداری لەگەڵ هاوتا چینییەکەی بکات.
دوای گفتوگۆکان، ترەمپ هەڵوێستێکی ئەرێنی وەرگرت و ڕایگەیاند: “پێموایە بڕیارە لەگەڵ چین بگەیەینە ڕێککەوتن.”
سەرۆککۆماری ئەمریکا ئاماژەی بە دیدارە شیمانە بۆکراوەکانی دیکە لەگەڵ شی جین پینگ لە چین و ئەمریکاش کرد و گوتی: “ئێمە ڕێککەوتووین کە یەکتر ببینین. بڕیارە دواتر لە چین دیداریان لەگەڵ بکەین و بڕیارە لە ئەمریکا، یان لە واشنتن یان لە مار-ئە-لاگۆ، دیداریان لەگەڵ بکەین.”