ڕوانگەی سووری بۆ مافەکانی مرۆڤ ڕایگەیاند، لە ماوەی کەمتر لە 72 کاتژمێری ڕابردوودا، 15 هاووڵاتیی سڤیل لە شار و شارۆچکە جیاوازەکانی سووریا کوژراون، کە دوو ژن و منداڵێکیشیان تێدایە، ئەمەش لە چوارچێوەی بەردەوامیی نائارامی و پێشێلکارییەکان دێت لەو وڵاتەدا.
ڕوانگەی سووری بۆ مافەکانی مرۆڤ لە ڕاپۆرتێکدا ئاشکرای کرد کە سووریا بەردەوامە لە گۆڕەپانی پێشێلکاریی مافەکانی مرۆڤ و نائارامیی بەرفراوان. بەپێی ڕاپۆرتەکە، لە ماوەی کەمتر لە سێ ڕۆژی ڕابردوودا (72 کاتژمێر)، 15 هاووڵاتیی سڤیل لە ئەنجامی کردەوەکانی کوشتن، ئەشکەنجەدان و دەستبەسەرکردن لە ناوچە جیاوازەکانی سووریا گیانیان لە دەست داوە.
ڕوانگەکە ئاماژەی بەوەش دا کە لە نێو قوربانییەکاندا، دوو ژن و منداڵێک هەن، کە لە شار و شارۆچکەکانی وڵاتەکەدا کوژراون. ئەم ڕووداوانە لە کاتێکدایە کە سووریا هێشتا بە قۆناغێکی ناسەقامگیر و پڕ لە توندوتیژیدا تێدەپەڕێت، و هاووڵاتییانی سڤیل باجی سەرەکیی ئەم نائارامییە دەدەن.