ڕۆن پرۆسۆر، باڵیۆزی ئیسرائیل لە ئەڵمانیا، ڕۆژی یەکشەممە ٩ی تشرینی دووەم، چین تۆمەتبار دەکات بەوەی یارمەتی ئێران دەدات بۆ پڕچەککردنەوەی حیزبوڵڵای لوبنان. پرۆسۆر ڕایگەیاند کە ئێران بە فراوانیی یارمەتی لە چین وەردەگرێت بۆ پڕچەککردنەوەی حیزبوڵڵا.
لە چاوپێکەوتنێکیدا لەگەڵ ڕۆژنامەکانی گرووپی میدیایی فونکە، پرۆسۆر وتی: “ئێران جارێکی دیکە حیزبوڵڵا پڕچەک دەکات و هاوکات یارمەتیی فراوان لە چین وەردەگرێت.”
ناوبراو ئاماژەی بەوەش دا کە پەکین لە چەند هەفتەی ڕابردوودا نەک تەنیا سیستەمەکانی بەرگریی ئاسمانیی دابین کردووە، بەڵکوو پارچەی پێویستیشی بۆ پڕۆگرامی هێرشکاریی مووشەکیی ئێران دابین کردووە.
باڵیۆزی ئیسرائیل لە ئەڵمانیا گوتیشی کە چینییەکان دەیانەوێت سوود لە کەمبوونەوەی کاریگەریی ڕووسیا وەربگرن بۆ ئەوەی “حکوومەتی ئێران زیاتر و زیاتر بە خۆیانەوە ببەستنەوە.”
حیزبوڵڵای لوبنان، کە لەلایەن کۆماری ئیسلامیی ئێرانەوە پشتیوانیی لێ دەکرێت و ئامانجی ڕاگەیەندراوی لەناوبردنی ئیسرائیلە، دەستبەجێ دوای دەستپێکردنی جەنگی غەززە لە تشرینی یەکەمی ٢٠٢٣، بە مووشەکبارانکردنی بەردەوام لە لوبنانەوە، بەرەیەکی دووەمی دژی ئیسرائیل کردەوە. سوپای ئیسرائیل لە وەڵامدا هێرشی ئاسمانیی فراوانی بۆ سەر ئامانجەکانی لوبنان دەستپێکرد و دواتر دەستی بە هێرشی زەمینیی کرد.
مانگی تشرینی دووەمی ساڵی ڕابردوو، ئاگربەستێک لەنێوان ئیسرائیل و حیزبوڵڵادا ڕاگەیەندرا، بەڵام هەردوو لا چەندین جار یەکتریان بە پێشێلکردنی ئاگربەستەکە تۆمەتبار کردووە. سوپای ئیسرائیل لەم دواییانەدا هێرشەکانی لە لوبنان چڕتر کردووەتەوە. حیزبوڵڵا بەهۆی جەنگی ئەم دواییانەی لەگەڵ ئیسرائیل بە شێوەیەکی بەرچاو لاواز بووە و حکوومەتی لوبنان، و هەروەها ئیسرائیل، داوای چەکداماڵینی ئەم گرووپە دەکەن، بەڵام حیزبوڵڵا تا ئێستا بەم داوایە ڕازی نەبووە.
