دیپلۆماتکارێکی عەرەب ئاشکرای کردووە، بڕیارە ئەمڕۆ چوارشەممە ١٩ی نۆڤەمبەر، ستیڤ ویتکۆف، نوێنەری تایبەتیی ئەمریکا، لە شاری ئیستانبوڵ لەگەڵ خەلیل ئەلحەیە، بەرپرسی باڵای بزووتنەوەی حەماس کۆ ببێتەوە بە مەبەستی گفتوگۆکردن لەبارەی هەوڵەکان بۆ پاراستنی ئاگربەست لە غەززە.
بەپێی سەرچاوەکان، ئەمە دووەمین دیدار دەبێت لە نێوان ویتکۆف و خەلیل ئەلحەیە. یەکەم دیدار لە ٩ی ئۆکتۆبەر و چەند کاتژمێرێک پێش واژۆکردنی ڕێککەوتنەکە لە میسڕ بەڕێوە چوو، کە تێیدا جێرد کوشنەر، ڕاوێژکاری دۆناڵد ترەمپ ئامادە بوو.
ویتکۆف بانگەشەی ئەوە دەکات کە لە کۆبوونەوەی پێشوودا سەرکردەکانی حەماس بەڵێنی چەکدانانیان داوە؛ بانگەشەیەک کە بزووتنەوەکە لە هەڵوێستە ئاشکراکانیدا ڕەتی کردووەتەوە و ڕایگەیاندووە مل بۆ داواکارییەکی لەو شێوەیە نادەن.
ئەم دیدارە پلان بۆ داڕێژراوە ئاماژەیە بۆ خواستی واشنتن بۆ هێشتنەوەی هێڵێکی پەیوەندیی ڕاستەوخۆ لەگەڵ حەماس، ئەوەش دوای ساڵانێک لە پشت بەستن بە نێوەندگیرەکانی وەک میسڕ، قەتەر و تورکیا.
هەواڵی ئەم دیدارە سەرەتا لەلایەن ڕۆژنامەی نیویۆرک تایمزەوە لە ڕۆژی هەینیی ڕابردوو بڵاو کرایەوە و دواتر کەناڵی ١٢ی ئیسرائیل کات و شوێنی دیدارەکەی ئاشکرا کرد.
هەواڵی پێشوو