ڕۆژی دووشەممە، ٢٢ی کانوونی یەکەمی ٢٠٢٥، شاندێکی باڵای تورکیا گەیشتە دیمەشق و لەگەڵ ئەحمەد شەرع، سەرۆکی سووریا و ژمارەیەک بەرپرسی دیکەی حکوومەتی سووریا کۆبووەوە. شاندە تورکییەکە پێکهاتبوو لە هاکان فیدان، وەزیری دەرەوە، یاشار گولەر، وەزیری بەرگری و ئیبراهیم کالن، سەرۆکی دەزگای هەواڵگریی تورکیا.
وەزارەتی دەرەوەی تورکیا ڕایگەیاند، بڕیارە بارودۆخی سووریا بە گشتی و باکوور و ڕۆژهەڵاتی سووریا بە تایبەتی تاوتوێ بکرێت. هەروەها چارەنووسی “مۆڕاندۆمی ١٠ی ئازار” یان ڕێککەوتننامەی نێوان هێزەکانی سووریای دیموکراسی (قەسەدە) و حکوومەتی سووریا، کە پەیوەستە بە ئاسایشی نەتەوەیی تورکیا، لە تەوەری گفتوگۆکان بوو.
ئەم ڕێککەوتننامەیە لە ١٠ی ئازاری ٢٠٢٥، لە نێوان ئەحمەد شەرع، سەرۆکی سووریا و مەزڵوم عەبدی، فەرماندەی گشتیی قەسەدە واژۆ کرا. بنودەکانی ڕێککەوتننامەکە بریتی بوون لە: گەرەنتی کردنی مافی هەموو سووریایییەکان بۆ نوێنەرایەتی کردن و بەشداریکردن لە پرۆسەی سیاسی و هەموو دامەزراوەکانی دەوڵەت بەپێی لێهاتوویی، بەبێ ڕەچاوکردنی پاشخانە ئایینی و نەتەوەییەکانیان. هەروەها داننان بە کۆمەڵگەی کورد وەک کۆمەڵگەیەکی ڕەسەن لە دەوڵەتی سووریادا و گەرەنتی کردنی مافی هاووڵاتیبوون و هەموو مافە دەستوورییەکانیان. ڕێککەوتننامەکە داوای وەستانی تەواوی تەقەکردنی لە سەرانسەری خاکی سووریا کرد، و تێکەڵکردنی هەموو دامەزراوە مەدەنی و سەربازییەکانی باکوور و ڕۆژهەڵاتی سووریا لەنێو ئیدارەی دەوڵەتی سووریادا، لەوانەش دەروازە سنوورییەکان، فڕۆکەخانە و کێڵگە نەوت و گازییەکان. هەروەها گەرەنتی کردنی گەڕانەوەی هەموو ئاوارە سووریایییەکان بۆ شار و گوندەکانیان و دابینکردنی پاراستنیان لەلایەن دەوڵەتی سووریا.
تورکیا قەسەدە وەک ڕێکخراوێکی تیرۆریستی دەبینێت و ڕێککەوتننامەی تێکەڵکردنیان بە ئاسایشی نەتەوەیی تورکیاوە گرێ دەدات. ئەنقەرە خوازیارە قەسەدە چەک دابنێت و دەستبەرداری گوتاری جوداخوازی بێت. سەرەڕای ئەوە، سەرەڕای ڕێککەوتنەکە، تا ئێستا بە تەواوی جێبەجێ نەکراوە و تا کۆتایی ساڵی ٢٠٢٥ وادەی جێبەجێکردنی دیاری کرا بوو.
هەواڵی پێشوو