دوای کوژرانی دوو سەربازی پێشووی ئەفغانی لە تاراندا، ڕاپۆرتەری تایبەتی مافەکانی مرۆڤی نەتەوە یەکگرتووەکان داوای ئەنجامدانی لێکۆڵینەوەی سەربەخۆی لەسەر ئەم ڕووداوە کرد.
ڕیچارد بێنێت، ڕاپۆرتەری تایبەتی مافەکانی مرۆڤی نەتەوە یەکگرتووەکان لە کاروباری ئەفغانستاندا، ڕۆژی دووشەممە، کانوونی یەکەمی ٨، لە پەیامێکدا کە لە تۆڕی کۆمەڵایەتی ئێکس (تویتەری پێشوو) بڵاوی کردەوە، ڕایگەیاند لە تیرۆرکردنی ئەکرەمەدین سهريع، فەرماندەی پێشووی پۆلیسی دەڤەری تەخار، و محەممەد ئەمین ئەڵماس، سەربازێکی دیکەی پێشووی ئەفغانی لە ئێراندا “زۆر نیگەرانە”.
ئەو جەختی لەوە کردەوە کە پێویستە ئەم تیرۆرکردنانە بە شێوەیەکی سەربەخۆ لێکۆڵینەوەیان لەسەر بکرێت و ئەنجامدەرانی بناسرێنەوە و بدرێنە دەست دادپەروەری.
ئەکرەمەدین سهريع و محەممەد ئەمین ئەڵماس ڕۆژی چوارشەممە، کانوونی یەکەمی ٢٤، لە گۆڕەپانی ولیعەسر لە تاراندا بە گولـلە کوژران. بەرپرسانی ئێران ڕایانگەیاندووە کە لێکۆڵینەوە لەسەر ئەم دۆسیەیە هێشتا بەردەوامە.
ئیسماعیل بەقایی، گوتەبێژی وەزارەتی دەرەوەی ئێران، ڕۆژی دووشەممە گوتی لێکۆڵینەوەکان لەسەر تیرۆرکردنی ئەم دوو سەربازە پێشووەی ئەفغانی بەردەوامە، بەڵام هیچ زانیارییەکی زیاتری نەدا.
پێشتر ئەحمەد مەسعود، سەرۆکی بەرەی بەرگریی نەتەوەیی ئەفغانستان، داوای لە بەرپرسانی ئێران کردبوو ئەم دۆسیەیە “بە جیددی و بە شەفافییەتەوە” لێکۆڵینەوەی لەسەر بکەن. ئەو لە پەیامێکی ڤیدیۆییدا گوتبووی دووبارەبوونەوەی ئەم جۆرە ڕووداوانە لەناو ئێراندا نیگەرانییەکانی زیاد کردووە.
لە هەمان کاتدا، لایەنە سیاسییەکانی دژبەری تاڵیبان ئەم تیرۆرکردنانە بە ئاراستەکراو دەزانن و تاڵیبانیان بە بەرپرسیار دەگوت، بەڵام تا ئێستا بەڵگەیەکی سەربەخۆ لەم بارەیەوە بڵاو نەکراوەتەوە و تاڵیبانیش هیچ کاردانەوەیەکی فەرمیی لەسەر ئەم تۆمەتانە نیشان نەداوە.
