میدیاکانی ئێران بڵاویان کردەوە ئەمڕۆ نوێنەرانی پەرلەمانی ئێران وەک کاردانەوەیەک بەرانبەر بە خستنەناوی سوپای پاسداران بۆ لیستی گرووپە تیرۆریستییەکانی یەکێتیی ئەۋروپا، بۆ دەربڕینی پاڵپشتی لەو دامەزراوە سەربازییە، بە جلی سوپای پاسدارانەوە لە پەرلەمان ئامادە بوون.
ئاژانسی هەواڵی تەسنیم نووسیویەتی لەسەر جایگەی دەستەی سەرۆکایەتیی پەرلەمانیش دروشمێک بە ناونیشانی “سوپا گەورەترین ڕێکخراوی دژەتیرۆری جیهانە” هەڵواسرابوو.
لە میانی گوتارەکانی پێش دەستپێکی دانیشتنەکەشدا، پەرلەمانتاران درووشمی جۆراوجۆریان گوتەوە، لەوانە: “ئەوروپا شەرمەزاری بۆ تۆ”.
جێی وەبیرهێنانەوەیە ڕۆژی پێنجشەممە ٢٩ی کانوونی دووەم، یەکێتیی ئەوروپا ڕایگەیاند سوپای پاسدارانی شۆڕشی ئیسلامیی خستووەتە لیستی ڕێکخراوە تیرۆریستییەکانەوە. ئەم بڕیارەی یەکێتیی ئەوروپا کاردانەوەی توندی زۆرێک لە بەرپرسانی کۆماری ئیسلامیی ئێرانی لێ کەوتەوە.