فوئاد حوسێن، وەزیری دەرەوەی عێراق، ئەمڕۆ لە پەیوەندییەکی تەلەفۆنیدا لەگەڵ سێرگی لاڤرۆڤ، وەزیری دەرەوەی ڕووسیا، دوایین پەرەسەندنە سەربازییەکانی ناوچەکە و کاریگەرییە سیاسی و ئابوورییەکانی تاوتوێ کرد.
تەوەرە سەرەکییەکانی گفتوگۆکە:
• پەیامی ڕووسیا: لاڤرۆڤ هەڵوێستی وڵاتەکەی بۆ فوئاد حوسێن ڕوون کردەوە و جەختی کردەوە کە باشترین چارەسەر گەڕانەوەیە بۆ مێزی گفتوگۆ و زاڵکردنی زمانی دیپلۆماسی بۆ کۆنتڕۆڵکردنی گرژییەکان.
• زیانەکانی عێراق: فوئاد حوسێن ئاماژەی بەوە کرد کە عێراق بووەتە یەکێک لەو وڵاتانەی کە بە ڕاستەوخۆ بەهۆی ململانێکانەوە زیانی پێگەیشتووە، چونکە لە لایەن هەردوو لایەنی شەڕەکەوە هێرشی دەکرێتە سەر.
• کەمیی هەوڵەکان بۆ ئاشتی: وەزیری دەرەوەی عێراق ڕایگەیاند کە هەرچەمدە چارەسەر لە ڕاگرتنی دەستبەجێی شەڕدایە، بەڵام ئاماژەکان نیشانی دەدەن کە هیچ هەنگاوێکی کردەیی و جددی لەو ئاراستەیەدا نییە.
• مەترسی لەسەر بازاڕی وزە: هەردوولا هۆشدارییان دا لەوەی داخستنی گەرووی هورمز و بەردەوامی شەڕ کاریگەری نەرێنی دەکاتە سەر هەناردەی نەوت و ئاسایشی وزەی جیهانی و دەبێتە هۆی بەرزبوونەوەی نرخەکان، کە ئەمەش زیان بە ئابووری جیهان دەگەیەنێت.
پەیوەندییە دووقۆڵییەکان:
لە بەشێکی تری پەیوەندییەکەدا، وەزیری دەرەوەی ڕووسیا بانگهێشتی هاوتا عێراقییەکەی کرد بۆ بەشداریکردن لە یازدەهەمین کۆبوونەوەی لیژنەی هاوبەشی عێراقی-ڕووسی کە بڕیارە لە مانگی ئایاری ئەمساڵ (٢٠٢٦) ئەنجام بدرێت.
هەروەها باس لە دۆسیەی چەند کێڵگەیەکی نەوتی لە پارێزگای بەسرە کرا، کە کۆمپانیاکانی (گازپڕۆمی ڕووسی و شیڤرۆنی ئەمریکی) تێیدا بەشدارن، لەگەڵ تاوتوێکردنی شایستە داراییەکان و پاراستنی بەرژەوەندییە نیشتمانییەکان.