فەرماندەیی ناوەندیی ئەمریکا (سێنتکۆم)، ئەمڕۆ شەممە، 21ـ3-2026 ڕایگەیاند، کە لە میانی ئەو جەنگەی ماوەی سێ هەفتەیە لە ناوچەکەدا هەڵگیرساوە، هێزەکانیان زیاتر لە 8 هەزار پێگەی سەربازیی ئێرانیان کردووەتە ئامانج.
فەرماندەیی ناوەندیی ئەمریکا ڕایگەیاند، “کۆگاکانی مووشەکی بالیستیی ئێران و ئەو ڕادارە ئێرانیانەمان کردووەتە ئامانج کە بۆ هەڕەشەکردن لە هاتوچۆی دەریایی بەکاردەهێنران.”
سێنتکۆم ئاماژەی بە قەبارەی زیانەکانی تاران کرد و ڕایگەیاند، “ئێران توانایەکی گەورەی شەڕکردنی لەدەستداوە، کە پێکهاتوون لە هەزاران مووشەک و فڕۆکەی بێفڕۆکەوان، هەروەها 130 کەشتیی ئێرانیشمان کردووەتە ئامانج.” لە لێدوانەکەدا ئەوەش ڕوون کراوەتەوە کە لە ئێستادا تواناکانی ئێران پاشەکشە و دابەزینێکی گەورە بەخۆیەوە دەبینێت.
فەرماندەییەکەی ئەمریکا تیشکی خستە سەر جۆری ئەو چەکانەی بەکاریهێناون و گوتی: “بۆمبی قورسی پێنج هەزار پاوەندیمان خستووەتە سەر حەشارگە و مۆڵگەکانی ئێران.”
لە کۆتاییدا فەرماندەیی ناوەندیی ئەمریکا جەختی لە بەردەوامیی ئۆپەراسیۆنەکانی کردەوە و ڕایگەیاند: “ئێمە سوورین لەسەر بەردەوامبوون لە ئەرکەکەمان دژی ئێران، و بۆ ئەم مەبەستەش بەردەوام دەبین لە بەکارهێنانی هێزی کوشندە.”
