ئامادەکارییەکان بۆ بەڕێوەچوونی دانوستانەکان لە ئیسلام ئاباددا بەباشی بەڕێوە دەچن. ئەمڕۆ و بەیانی لەم شارەدا پشووی فەرمی ڕاگەیەندراوە و هەر بەم هۆیەوە قوتابخانە و فەرمانگە حکوومییەکان داخراون.
ڕێگاکانی دەوروبەری “ناوچەی سوور”ی شارەکەش، واتە ئەو شوێنەی زۆربەی باڵەخانە حکوومی و باڵیۆزخانەکانی لێیە، داخراون.
ئەو ئاگربەستەی پاکستان ڕۆڵی لە نێوەندگیرییەکەیدا هەبووە، چەندین جار بە “لەرزۆک” وەسف کراوە و نیشانەکانی تێکچوونی لەوانە بەهۆی هێرشەکانی ئیسرائیلەوە بۆ سەر لوبنان، هەر ئێستا دەرکەوتوون.
سەرۆکوەزیرانی پاکستان لە پەیامێکدا بۆ ڕاگەیاندنی ئەم ڕێککەوتنە بڵاوی کردەوە، گوتبووی هەردوو لایەن و هاوپەیمانەکانیان بە “ئاگربەستی دەستبەجێ لە هەموو شوێنێک، بە لوبنانیشەوە” ڕازی بوون. بەڵام ئیسرائیل و کۆشکی سپی ڕایانگەیاندووە لوبنان لەم ڕێککەوتنەدا جێگەی نەکراوەتەوە.
پێشهاتەکانی لوبنان بەڕوونی جێگەی نیگەرانیی پاکستانن. هەم وەزیری دەرەوە و هەم سەرۆکوەزیرانی ئەم وڵاتە ئاماژەیان بەم بابەتە کردووە. ڕۆژی ڕابردوو سەرۆکوەزیرانی پاکستان داوای دانبەخۆداگرتنی کرد تاوەکوو دەرفەت بۆ هەوڵە دیپلۆماسییەکان بڕەخسێت.
پاکستان هیوادارە سەرەڕای جیاوازییە بەرچاوەکانی نێوان هەڵوێستە ئاشکراکانی ئەمریکا و ئێران، ئەگەر هەردوو لایەن بتوانن لە ئیسلام ئاباددا یەکتر ببینن، زەمینەیەک بۆ گەیشتن بە خاڵە هاوبەشەکان بڕەخسێت.
