سوپای ویلایەتە یەکگرتووەکانی ئەمریکا توانای سەربازیی خۆی لە ناوچەی کەنداودا کۆ دەکاتەوە. بەگوێرەی زانیاریی سەرچاوە ئەمریکاییەکان، کەشتیی فڕۆکەهەڵگری “یو ئێس ئێس جۆرج ئێچ دەبلیوو بوش” ئێستا لە چوارچێوەی بەرپرسیارێتیی فەرماندەیی ناوەندیی ئەمریکا (سێنتکۆم) جێگیر بووە.
ئەمە یەکەم جارە لە ساڵی ٢٠٠٣وە سێ کەشتیی فڕۆکەهەڵگری ئەمریکایی بە شێوەیەکی هاوکات لە ڕۆژهەڵاتی نێوەڕاستدا بن. پێشتر هەردوو کەشتیی “ئەبراهام لینکۆڵن” و “جێراڵد فۆرد” لە ئۆپەراسیۆنە جەنگییەکاندا بەشدارییان کردبوو. ئەم کەشتیانە پێکەوە زیاتر لە ٢٠٠ فڕۆکە و نزیکەی ١٥ هەزار سەربازیان تێدایە.
ئەم بەهێزکردنە سەربازییە لە کاتێکدایە ئاگربەستێکی لەرزۆک لە نێوان ئەمریکا و ئیسرائیل لەگەڵ ئێراندا هەیە و دانوستانەکان ڕاوەستاون. ئێران ڕایگەیاندووە لادانی گەمارۆی دەریایی ئەمریکا لەسەر بەندەرەکانی، مەرجی دەستپێکردنەوەی گفتوگۆکانە.
دۆناڵد ترەمپ، سەرۆککۆماری ئەمریکا، ئەم هەفتەیە ئاگربەستەکەی درێژ کردەوە، بەڵام ئاماژەی بەوە کرد گەمارۆی دەریایی بەردەوام دەبێت. ئەو گوتیشی بۆ گەیشتن بە ڕێککەوتن پەلەی نییە، چونکە ئێران لە ژێر فشاری ئابووریدایە. ئێران ئەم گەمارۆیەی بە “کردەوەیەک لە ئاستی شەڕ” ناو بردووە.
