مارکۆ ڕۆبیۆ، وەزیری دەرەوەی ئەمریکا گەیشتە ڤاتیکان و لەگەڵ پاپا فرانسیس، ڕێبەری کاسۆلیکەکانی جیهان کۆبووەوە. ئەم سەردانە لە کاتێکدایە کە پەیوەندییەکانی نێوان دۆناڵد ترەمپ و پاپا فرانسیس مێژوویەکی پڕ لە گرژی و لێدوانی توندیان بەرامبەر یەکدی هەیە.
مارکۆ ڕۆبیۆ لە چوارچێوەی گەشتە دیپلۆماسییەکانیدا سەردانی ڤاتیکانی کرد. ڕۆبیۆ کە خۆی پەیڕەوکاری ئایینی کاسۆلیکە، وەک یەکەم بەرپرسی باڵای ئیدارەی نوێی ئەمریکا لەگەڵ پاپا فرانسیس کۆبووەوە بۆ تاوتوێکردنی چەند پرسێکی جیهانی و مرۆیی.
ئەم دیدارە سەرنجی میدیاکانی جیهانی ڕاکێشاوە، چونکە لە ڕابردوودا پەیوەندییەکانی نێوان دۆناڵد ترەمپ، سەرۆکی ئەمریکا و پاپا فرانسیس ئاڵۆزیی زۆری تێکەوتووە. دیارترین پێکدادانی زارەکی نێوانیان دەگەڕێتەوە بۆ ساڵی ٢٠١٦، کاتێک پاپا ڕەخنەی لە پلانەکەی ترەمپ گرت بۆ دروستکردنی دیوار لەسەر سنووری مەکسیک و گوتی: “هەر کەسێک تەنیا بیر لە دروستکردنی دیوار بکاتەوە نەک پرد، مەسیحی نییە.”
لە بەرامبەردا، دۆناڵد ترەمپ لە ڕێگەی پۆستەکانی لە سۆشیاڵ میدیا و لێدوانە ڕۆژنامەوانییەکانی، بە توندی وەڵامی پاپای دایەوە و لێدوانەکانی پاپای بە “نەگونجاو” وەسف کرد و ڕایگەیاندبوو: “بۆ ڕێبەرێکی ئایینی جێگەی شەرمەزارییە گومان لە باوەڕی کەسێکی دیکە بکات.”
چاودێران پێیان وایە ناردنی مارکۆ ڕۆبیۆ بۆ ڤاتیکان، کە کەسایەتییەکی نزیکە لە کەنیسە، هەوڵێکی ئیدارەی ترەمپە بۆ نەرمکردنەوەی ئەو گرژییانە و کردنەوەی لاپەڕەیەکی نوێ لە پەیوەندییەکانی نێوان واشنتن و ڤاتیکان، سەرەڕای ئەو جیاوازییە قووڵانەی لە دیدی هەردوولادا بۆ پرسەکانی کۆچبەران و گۆڕانی کەشوهەوا هەیە.