وتەبێژی وەزارەتی دەرەوەی ئێران، عەباس عەراقچی، سێشەممە ڕایگەیاند کە دەستپێکی فەرمی جێبەجێکردنی یادداشتی تێگەیشتن لەنێوان ئێران و ئەمریکا، ڕۆژی هەینی داهاتوو دەست پێ دەکات، و ئاماژەی کرد کە «ڕاگەیاندنی کۆتایی هاتنی جەنگ» گرنگترین بابەتی قۆناغی یەکەمی ڕێککەوتنەکەیە.
عەراقچی لە کۆبوونەوەیەک لەگەڵ دیپلۆماتکارانی بیانی، کە تەلەفزیۆنی فەرمی ئێران بڵاوی کردەوە، وتی: «ئەگەری زۆر هەیە لە ڕۆژی هەینی داهاتوو دەورێکی نوێی گفتوگۆکان لەنێوان ئێران و ویلایەتە یەکگرتووەکان دەست پێ بکات بۆ گەیشتن بە ڕێککەوتنێکی کۆتایی.»
بەپێی وتەکانی، ئەم دەورە نوێیەی گفتوگۆکان لە سوئیس بەڕێوە دەچێت، و جەختی کردەوە کە پرسی پڕۆگرامە ناوکییەکەی ئێران لە قۆناغی کۆتایی گفتوگۆکاندا باس و تاوتوێ دەکرێت.
وەزیری دەرەوەی ئێران هەروەها ئاماژەی بەوە دا کە هەر هێرشێکی ئیسرائیل بۆ سەر لوبنان یان داگیرکردنی هەر بەشێک لە خاکی لوبنان، بە پێشێلکاریی ڕێککەوتنەکە لەگەڵ ئەمریکا دادەنرێت.
عەراقچی وتی: «لە ڕوانگەی ئێمەوە، دوو لایەنی ئەم یادداشتە بریتین لە ئەمریکا و ئیسرائیل لە یەک لایەوە، و ئێران و حیزبوڵڵا لە لایەکی ترەوە.» هەروەها زیادیکرد: «لەوانەیە ئەمە گرنگترین خاڵی یادداشتەکە بێت، کە بریتییە لە ڕاگەیاندنی کۆتاییەکی دەستبەجێ و هەمیشەیی بۆ جەنگ لە هەموو بەرەکان، بە تایبەتی لوبنان.
تا ئێستا وردەکاریی تەواوی ڕێککەوتنی کاتی بڵاونەکراوەتەوە، و هێشتا ڕوون نییە کە ناوەڕۆکی تەواوی ئەو ڕێککەوتنە چییە.