پەیمانگای “ڕۆبێرت کۆخ” (RKI) بۆ تەندروستی گشتی لە ئەڵمانیا ڕایگەیاند، بەهۆی شەپۆلی گەرمای ئەمساڵەوە تا ئێستا بە شێوەیەکی مەزەندەکراو 5,120 کەس گیانیان لەدەستداوە. زۆربەی ئەم حاڵەتانە لە کۆتایی مانگی حوزەیراندا تۆمارکراون، کاتێک تێکڕای پلەکانی گەرمی بە شێوەیەکی بەرچاو بەرزبوونەتەوە.
پەیمانگاکە لە ڕاپۆرتی هەفتانەی خۆیدا ئاماژەی بەوە کردووە کە نزیکەی 4,270 کەس لەو کەسانەی گیانیان لەدەستداوە، تەمەنیان لە سەرووی 75 ساڵییەوە بووە. هەروەها ئامارەکان دەریدەخەن کە ڕێژەی مردن لەنێو ژناندا زیاتر بووە و ئەوەش بۆ ئەوە دەگەڕێتەوە کە ڕێژەی ژنانی تەمەن بەساڵاچوو لە ئەڵمانیا زیاترە.
ئەم داتایانەی ئەڵمانیا بەشێکن لە وێنەیەکی گەورەتر و مەترسیدارتر لەسەرانسەری ئەوروپادا. دەزگای “کۆپەرنیکۆس”ی سەر بە یەکێتی ئەوروپا بۆ گۆڕانی کەشوهەوا، لە ڕاپۆرتێکدا ڕایگەیاند کە مانگی حوزەیرانی ڕابردوو گەرمترین مانگ بووە لە مێژووی تۆمارکراوی ئەوروپای ڕۆژئاوادا، کە تێکڕای پلەی گەرمی گەیشتووەتە 20.7 پلەی سەدی.
هاوکات، دەسەڵاتدارانی وڵاتانی تری وەک فەرەنسا، بەلجیکا، ئیسپانیا و هۆڵەندا ڕایانگەیاندووە کە لە ماوەی نێوان 20 بۆ 28ی حوزەیراندا، زیاتر لە 4,700 کەس بەهۆی لێکەوتەکانی گەرماوە گیانیان لەدەستداوە.
پسپۆڕانی کەشوهەوا و تەندروستی هۆشداری دەدەن کە بەرزبوونەوەی پلەکانی گەرمی پەیوەندی ڕاستەوخۆی بە گۆڕانی کەشوهەواوە هەیە و کاریگەرییەکی کوشندەی لەسەر توێژە لاوازەکانی کۆمەڵگە، بەتایبەت بەساڵاچووان، دروست کردووە.
رۆیتهرز