پیت هێگسێت، وەزیری بەرگریی ئەمریکا، ڕایگەیاند کە تێچووی جەنگی وڵاتەکەی لە دژی ئێران تاوەکو ئێستا گەیشتووەتە ٣٧.٥ ملیار دۆلار. ئەم ڕاگەیاندنە لە کاتێکدایە کە وهزیری بهرگری لەبەردەم ئهندامانی کۆنگرێسدا ڕووبەڕووی ڕەخنەی توند بووەوە سەبارەت بە داواکاریی نوێ بۆ دابینکردنی بوودجەی زیاتر بۆ ئەم ململانێیە.
لە کۆبوونەوەیەکی لیژنەی دارایی کۆنگرێسدا، هێگسێت ئاماژەی بەوە کرد کە ئەو بڕە پارەیە خەرجییەکانی جەنگەکە تاوەکو کۆتایی مانگی ئەیلوول لەخۆ دەگرێت. ئەمە لە کاتێکدایە کە تەنها شەش مانگ بۆ هەڵبژاردنە نیوەییەکانی ئەمریکا ماوە و دیموکراتەکان هەوڵ دەدەن تێچووی جەنگ وەک فشارێکی سیاسی دژی ئیدارەی ترەمپ بەکاربهێنن.
وەزارەتی بەرگریی ئەمریکا (پێنتاگۆن) داوای ٩٠ ملیار دۆلاری دیکەی وەک بوودجەی فریاگوزاری کردووە کە زۆربەی بۆ جەنگی ئێران تەرخان دەکرێت. هەروەها هێگسێت داوای کردووە بوودجەی ساڵی ٢٠٢٧ی وەزارەتەکەی بگەیەنرێتە ١.٥ تریلیۆن دۆلار و هۆشدارییدا کە “ئەگەر ئەم بوودجەیە دابین نەکرێت، گەورەترین هەڕەشە بۆ سەر ئاسایشی نەتەوەیی ئەمریکا دروست دەبێت.”
یاسادانەرانی هەردوو پارتی کۆماری و دیموکرات نیگەرانی خۆیان دەربڕیوە کە ئیدارەی ترەمپ ئەوانی لە وردەکاریی پلانەکانی جەنگ بێبەش کردووە. سیناتۆر پاتی مۆرای، سەرۆکی لیژنەی پەسندکردنی دارایی، ڕایگەیاند: “سەرۆک هەڕەشەی پەرەپێدانی جەنگ و ئەنجامدانی تاوانی جەنگ دەکات، ئەمەش نیشانەی جەنگێکی بێکۆتاییە.”
دوای شکستهێنانی ئاگربەستێکی کاتی لەم مانگەدا، هێرشە ئاسمانییەکان لە نێوان هەردوو لایەندا چڕتر بوونەتەوە. بەپێی ئامارەکانی پێنتاگۆن:
- تا ئێستا ١٨ سەربازی ئەمریکی لەم جەنگەدا کوژراون.
- نزیکەی ٤٣٠ سەربازی دیکە بریندار بوون، کە تەنها لە دوای ٧ی تەممووزەوە ١٠٠ برینداری نوێ تۆمارکراوە.
سەرۆک دۆناڵد ترەمپ لە چەند ڕۆژی ڕابردوودا هەڕەشەی کردووە کە ئامانجەکانی هێرشەکانیان فراوانتر دەکەن بۆ سەر وێستگەکانی وزە، پردەکان و گرتنی دوورگەی “خارگ” کە ناوەندی هەناردەی نەوتی ئێرانە. هەروەها ترەمپ ئاماژەی بەوە کردووە کە بەم زووانە بنکە ناوەکییە ژێرزەمینییەکانی ئێران لە ناوچەی ناسراو بە “Pickaxe Mountain” بۆردومان دەکەن.
ئەم ئاڵۆزییانە لە کاتێکدایە کە سوپای ئەمریکا و ئیسرائیل لە ٢٨ی شوباتەوە زنجیرەیەک هێرشی بەردەوامیان بۆ سەر بنکە و دامەزراوەکانی ئێران دەستپێکردووە، ئەمەش بووەتە هۆی تێکچوونی باری ئابووری و سەربازیی ناوچەکە.
رۆیتهرز