ڕۆژی چوارشەممە 8ـی 4ـی 2024 بەئامادەبوونی د. سالار عوسمان، بەرپرسی بەشی ڕۆشنبیری و ڕاگەیاندن و کەسایەتی حزبی، حکومی، ڕۆشنبیران، نووسەر و ئەکادمیست، ڵێکولەران و میدیاکاران، مەراسیمی “فەرهەنگی زارەکیی موکریان شاکارێک لە مێژووی فەرهەنگنووسی کوردیدا” بەڕێوەچوو.
پاش خولەکێک وەستان بۆ گیانی پاکی شەهیدان، د. سالار عوسمان، بەرپرسی بەشی ڕۆشنبیری و ڕاگەیاندنی پ.د.ک لە پەیڤی بەشی ڕۆشنبیری و ڕاگەیاندن وێڕای بەخێرهینانی میوانان، ئاماژەی بەوە کرد گەلی زیندوو بریتییە لەو گەلەی سایکولۆژیایی زمان و شانازی زمان بۆ نەوەکانیان دروست بکەن، بۆیە سوپاسی دەزگای موکریانی سەربە بەشی ڕۆشنبیری و ڕاگەیاندنی پ.د.ک دەکەین کە چوار ساڵە لەگەڵ نووسەر و فەرهەنگنووس (سەلاح پایانییانی) هەوراز و نشێو و زەحمەتیان بینیوە تاگەیشتن بە ئەمڕۆ و بەناوی ئامادەبووان سوپاسی (سەلاح پایانیانی) کرد کە چارەگە سەدەیەکی بۆ ئەم پڕۆژە مەزنە تەرخانکرد.
پاشان لەسەر ڕونما فیچەرێک و دیکیۆمێنتاریەک سەبارەت بە گرنگی (فەرهەنگی زارەکی موکریان) نمایشکران.
کاروان عەبدوڵڵا وتاری دەزگای چاپ و بڵاوکرنەوەی موکریانی پێشکەش کرد و تێیدا ئاماژەی بە قوناغەکانی بەچاپگەیاندن و کۆتایی هێنانی فرهەنگی زارەکیی موکریان کرد.
موزیک و گۆرانی بەشێکی دیکەی مەراسیمەکە بوون و تیپی موزیکی (ئاڵا) بە چەند گورانییەکی کوردی مەراسیمەکەیان جوانتر کرد.
نووسەر و فەرهەنگنووس(سەلاح پایانیانی) گوتەیەکی پێشکەش کرد و تێیدا گوتی: پڕ بەدڵ سوپاس و دەست خۆشی لەوکەسانە دەکەم ئەم مەراسیمەیان سازکردووە، لەسەروی هەموویان جەنابی کاک د. سلار عوسمان،
سوپاسی ئەو دۆست و برادەرانە دەکەم کە هاوکار بوون، ئەگەر دڵسۆزی ئەوان نەبوایە نەئەو کۆڕە پێک دەهات و نە ئەو ئامادەبوانە بەهۆجە بۆ من هەلدەپشکۆتن.
لە کوتایی مەراسیمەکە سوپاس و پێزانین و چەپکە گوڵی بەشی ڕۆشنبیری و ڕاگەیاندن پێشکەشی نووسەر و فەرهنگنووس(سەلاح پایانیانی) و هاوکارەکانی کرا.
جێگای ئاماژەپێدانە دەزگای چاپ و بڵاوکردنەوەی موكریانی ، بە گرێبەستێک لەگەڵ نووسەری بەتوانا (سەڵاح پایانیانی،), پڕۆژەی چاپکردنی فەرهەنگی زارەکیی موکریان ـی لە ئەستۆ گرتبوو كه پێكهاتووه له (١٥) به‌رگی سه‌ره‌كی و (٤) چوار به‌رگی پاشكۆ كه گۆی گشتی ده‌كاته زیاتر له ده هه‌زار لاپه‌ڕه، توانی لەماوەی چوار ساڵ و نیودا چاپکردنەکە کۆتایی پێ بێنێ ، بەو شێوەیە ، توانرا بە هیممەتی نووسەرو دەزگای موکریانی گەورەترین فەرهەنگی زمان بکەنە میوانێکی دەوڵەمەندی کتێبخانەی کوردی.
