د. ویداد ئاکرەیی، چالاکوانی دیاری مافەکانی مرۆڤ و شارەزای بواری تەندروستی، ڕایگەیاند، پەڕتووکی یاداشتنامەکەی بە ناونیشانی “کچی کوردستـان: ژیانێک بۆ خزمەتی مرۆڤایەتی”، وەرگێڕدراوەتە سەر زمانی ئیسپانی و ئێستا لە سەرانسەری جیهاندا لە ڕێگەی ئامازۆنەوە بەردەستە.
لە پۆستێکدا لە هەژماری تایبەتی خۆی لە فەیسبووک، د.ویداد ئاماژەی بە گرنگیی وەرگێڕان داوە و نووسیویەتی: “وەرگێڕان تەنیا گۆڕینی وشەکان نییە؛ بەڵکو بەشکردنی دڵە لەگەڵ بێنەر و خوێنەرێکی نوێدا”. هەروەها سوپاسی هەموو ئەو کەسانەی کردووە کە پشتیوانیی ڕێبازەکەیان کردووە لە خزمەتکردنی مرۆڤایەتیدا و داوا دەکات هەواڵەکە بگەیەننە خوێنەرانی ئیسپانی.
وەک تەواوی دەستپێشخەرییەکانی دیکەی، د. ویداد ڕایگەیاندووە، تەواوی داهاتی فرۆشتنی ئەم پەڕتووکەش بۆ کار و دۆزە مرۆییەکان تەرخان دەکرێت.
ویداد ئاکرەیی هەڵگری بڕوانامەی دکتۆرایە لە تەندروستیی نێودەوڵەتی و پەتاناسی، هاودامەزرێنەری ڕێکخراوی “دیفێند ئینتەرناشناڵ”ـە. لە کاتی وەرگرتنی خەڵاتی ئاشتیی نێودەوڵەتیی پفێفەر “Pfeffer“ لە 2014، خەڵاتەکەی پێشکەش بە دانیشتووانی کۆبانێ، شەنگال و کرستیانە چەوساوەکانی ڕۆژهەڵاتی ناوەڕاست کرد.
بەهۆی خەباتە بەردەوامەکانی لە بواری مافەکانی مرۆڤ، داماڵینی چەکی کیمیایی و بایۆلۆجی و چەسپاندنی کولتووری پێکەوەژیان، چەندین خەڵاتی جیهانیی بەدەستهێناوە، لەوانە خەڵاتی “Pacem in Terris“ لە 2017 و خەڵاتی “Simply Woman Harmony“ لە 2018 ورگرت.