ساندرا بولوک، ئەستێرەی دیاری ئەمریکی، ئاشکرای کرد کە ساڵانی یەکەمی لە شاری نیویۆرک پڕبوون لە ئەزموونی سەخت و تاقیکردنەوەی ئاڵۆز. بولوک ئاماژەی بۆ ئەوە کرد، سەرەتا وەک گارسۆن کاری کردووە بۆ دابینکردنی بژێوی ژیانی و بەردەوام بەشداری لە تاقیکردنەوەکانی نواندندا کردووە.
روونیشی کردەوە، بەشێک لە دەرهێنەران داوای نەگونجاویان لێکردووە کە سنورەکانی تێپەڕاندووە، بەڵام بڕیاری داوە بەردەوام ڕێز لە بەهاکانی خۆی بگرێت و لەو ڕۆڵانە بکشێتەوە کە هەستی بە ئارامی تێدا نەکردووە.
لە بەشێکی دیکەی قسەکانیدا لەگەڵ جێنیفەر ئەنیستن لە گۆڤاری ئینتەرڤیو، بولوک باسی لە بڕیاری دوورکەوتنەوەی لە فیلمە کۆمیدییە ڕۆمانسییەکان کرد، دوای ئەوەی سەرکەوتنی گەورەی تێدا بەدەستهێنابوو.
جەختی کردەوە، ویستوویەتی تواناکانی لە ڕۆڵی دراماییدا تاقیبکاتەوە، وەک ئەوەی لە فیلمی “Crash” پێشکەشی کرد.
ئەنیستنیش بەرگری لە ڕەگەزی کۆمیدیا کرد و جەختی کردەوە کە پێویستی بە لێهاتوویی بەرز هەیە، لەو بڕوایەدایە کە جێهێشتنی ناوچەی ئارامیی هونەرمەند، دەرفەتێکی نوێیە بۆ دۆزینەوەی توانای شاراوە.