وەزیری دەرەوەی پاکستان ڕایگەیاند کە کۆماری ئیسلامیی ئێران پێشنیازی کردووە دەست بە گفتوگۆی سیاسی لەگەڵ حوسییەکانی یەمەندا بکرێت، بڕیاریشە ئەو پێشنیازە لە هەفتەی داهاتوودا لە کۆبوونەوەیەکی بەپەلەی هاوپەیمانیی بەرگریی مەککە لە شاری ڕیاز تاوتوێ بکرێت.
ئەم پێشنیازە لە کاتێکدایە کە سعوودیە ڕووبەڕووی شەپۆلێکی توندی هێرشەکانی حوسییەکان بووەتەوە و گرووپەکە بەوە تۆمەتبار دەکات کە پیرۆزترین شارەکانی ئیسلام دەکاتە ئامانج.
ئیسحاق دار، جێگری سەرۆک‌وەزیران و وەزیری دەرەوەی پاکستان، لە کۆنگرەیەکی ڕۆژنامەوانیدا ڕایگەیاند کە سێ ئەندامەکەی پەیمانەکە (عەرەبستانی سعوودیە، تورکیا و پاکستان) لەو کۆبوونەوەیەدا بڕیار لەسەر هەنگاوەکانی داهاتوو دەدەن، وتیشی کە وادەی کۆبوونەوەکە دواتر دیاری دەکرێت.
وەزیری دەرەوەی پاکستان ئاماژەی بەوە کرد کە تاران خۆی لە حوسییەکان و گرووپە چەکدارەکانی عێراق بەدوور گرتووە، هەروەها هەریەک لە مەسعوود پزیشکیان، سەرۆککۆماری ئێران و عەباس عێراقچی، وەزیری دەرەوە خوازیاری کۆتاییهێنانن بەم کێشەیە. ئیسحاق دار وتیشی کە تاران لە وردەکاریی پەیمانە بەرگرییەکە و پابەندبوونی پاکستان پێیەوە ئاگادار کراوەتەوە.
دار سەبارەت بە پێشنیازەکە ڕوونی کردەوە: «هیچ پێشنیازێکی نووسراو و کۆنکرێتی لە ئارادا نییە، بەڵکوو تەنیا بیروڕا گۆڕینەوە بووە لە نێوان هەردوو وەزیری دەرەوەدا، ئەم ڕێگەچارە سیاسییەش وەک بەدیلێک بۆ “هێرش و کردەوەی سەربازی” تاوتوێ دەکرێت.»
لە بارەی فراوانبوونی هاوپەیمانێتییەکەوە، دار ئاشکرای کرد کە زیاتر لە شەش وڵات خواستی خۆیان بۆ چوونە ناو پەیمانەکە دەربڕیوە، بەڵام داواکاریی ئەندامێتیی نوێ وەرناگیرێت تا ئەو کاتەی هاوپەیمانییەکە بە تەواوی کارا دەبێت، کە ڕەنگە تا ساڵێکی دیکە بخایەنێت.
جێی وەبیرهێنانەوەیە، عەرەبستانی سعوودیە، تورکیا و پاکستان لە ٧ی ئابی ڕابردوودا «ڕێککەوتننامەی بەرگریی هاوبەشی مەککە»یان واژۆ کرد، کە بەپێی ڕێککەوتنەکە، هەر پەلامارێکی چەکداری بۆ سەر هەر یەکێکیان وەک هێرش بۆ سەر هەرسێ وڵات هەژمار دەکرێت.
هاوکات سوپای پاکستان لە ڕاگەیەندراوێکدا بە توندی سەرکۆنەی هێرشەکانی ئەم دواییەی حوسییەکانی بۆ سەر سعوودیە کرد و جەختی لە پشتیوانیی تەواوی خۆی بۆ سعوودیە و پاراستنی شوێنە پیرۆزەکانی ئیسلام کردەوە.
لە کۆتایی لێدوانەکانیدا، وەزیری دەرەوەی پاکستان پرسی گەرووی هورمزی ورووژاند و ڕایگەیاند کە نابێت هیچ باج یان تێچوویەک بۆ پەڕینەوە بە گەرووەکەدا بسەپێنرێت، کە لە ئێستادا گەمارۆدانی ئەو گەرووە بووەتە خاڵێکی سەرەکیی دانوستاندنەکان بۆ کۆتاییهێنان بە ململانێی نێوان ئەمریکا و ئێران.