وەزارەتی بەرگریی عێراق، بەیانی ئەمڕۆ شەممە ٢٨28-3-2026، ڕایگەیاند کە فڕۆکەیەکی بێفڕۆکەوان (درۆن) لە ناو سنووری کێڵگەی نەوتی مەجنوون لە پارێزگای بەسرە کەوتووەتە خوارەوە، بەبێ ئەوەی هیچ زیانێکی لێ بکەوێتەوە.
لە بەیاننامەیەکی فەرمیی وەزارەتەکەدا هاتووە: “لە کاتژمێر 8:30 بەیانی ئەمڕۆ، درۆنێک لە سنووری قەزای دەیر لە ناو کێڵگەی نەوتی مەجنوون کەوتە خوارەوە. درۆنەکە نەتەقیوەتەوە و ڕووداوەکە هیچ جۆرە زیانێکی گیانی یان ماددیی بە دامەزراوە نەوتییەکان نەگەیاندووە.”
وەزارەتی بەرگری ئاماژەی بەوەش کردووە، کە دەستبەجێ فەرماندەیی ئۆپەراسیۆنەکانی بەسرە و تیمی ئەندازیاری و مەفرەزەکانی پووچەڵکردنەوەی تەقەمەنی گەیشتوونەتە شوێنی ڕووداوەکە. تیمە پسپۆڕەکان توانیویانە بەپێی ڕێکارە سەربازییەکان مامەڵە لەگەڵ درۆنەکە بکەن و لە شوێنەکە دووری بخەنەوە.
لە کۆتایی ڕاگەیەندراوەکەدا، وەزارەتی بەرگریی عێراق دووپاتی کردەوە کە هێزە ئەمنییەکان و سوپا لە ئامادەباشی تەواودان بۆ پاراستنی کێڵگە نەوتییەکان و هەموو ئەو دامەزراوە ستراتیژییانەی کە بۆ ئابووریی وڵات گرنگییەکی حەیاتییان هەیە، و ڕێگە بە هیچ هەڕەشەیەک نادەن بۆ سەر سلامەتیی کارمەندان و هاووڵاتییان.