توێژینەوەیەکی نوێ ئاشکرای دەکات ئەو ماددە کیمیایی و تامبەخشانەی لە جگەرە ئەلیکترۆنییەکاندا بەکاردێن، تەنانەت ئەگەر هیچ نیکۆتینێکیشیان تێدا نەبێت، دەبنە هۆی زیانگەیاندن بە تەندروستیی جومگەکان و تێکشکانی شانەکان.
بەپێی توێژینەوەیەک کە لە زانکۆی «سیتۆن هۆڵ» لە ویلایەتی نیوجێرزی ئەنجام دراوە، تامەکانی وەک «دارچینی» و «مێنتۆڵ» زیانێکی تایبەتیان هەیە و دەبنە هۆی مردنی خانە کڕکڕاگییەکانی ناسراو بە «ATDC5». زانایان بۆیان دەرکەوتووە ئەم ماددە کیمیایییانە توانای خانەکان بۆ دروستکردن و پاراستنی شانەی تەندروست تێکدەدەن، هاوکات هەوکردن و هەڵئاوسان لە جەستەدا دروست دەکەن کە دەبێتە هۆی شیکردنەوەی شانەکان.
جێسیکا کۆترێڵ، دانشیاری زانکۆکە لەم بارەیەوە ڕایگەیاندووە: «دەرئەنجامەکانمان پیشانی دەدەن ماددە تامبەخشەکانی جگەرەی ئەلیکترۆنی بە هیچ شێوەیەک بێزیان نین. ئەم پێکهاتە کیمیایییانە، تەنانەت بەبێ بوونی نیکۆتینیش، میتابۆلیزم، دەربڕینی جینەکان و ڕێڕەوەکانی هەوکردن دەگۆڕن. ئەمەش پێویستییەکی بەپەلە دەخاتە ڕوو بۆ لێکۆڵینەوە لە کاریگەرییەکانی ئەم ئامێرانە لەسەر کۆئەندامی ماسولکە و ئێسک.»
توێژەران ئاماژەیان بەوەش کردووە، ماددەی «سیناماڵدیهاید» کە لە تامی دارچینیدا هەیە، لە توێژینەوەکانی پێشوودا پەیوەندیی بە لەناوچوونی خانەکانی سی و کۆئەندامی هەناسەوە هەبووە؛ هەروەها توێژینەوەکانی زانکۆی «ڕاتگێرز» و «هاوایی»ش زیانەکانی مێنتۆڵیان پشتڕاست کردووەتەوە.
لە کاتێکدا بەپێی ئامارەکان نزیکەی لەسەدا ٧ بۆ ٨ی هاووڵاتیانی پێگەیشتووی ئەمریکا جگەرەی ئەلیکترۆنی بەکاردەهێنن، پسپۆڕان هۆشداری دەدەن کە ئەم ئامێرانە بە تەواوی سەلامەت نین. کۆمەڵەی دڵی ئەمریکیش ڕایگەیاندووە جگە لە مەترسیی ئاڵوودەبوون بە نیکۆتین، شلەی نێو ئەم ئامێرانە فلزاتی قورس، پێکهاتەی ئەندامیی هەڵفڕیو و ماددەی شێرپەنجەهێنەری تێدایە، و لە کاتی بەرکەوتن یان قوتدانی بە هەڵە لەلایەن منداڵان و گەورەساڵانەوە دەبێتە هۆی ژەهراویبوون.