عێراق، ئوردن، سووریا و پاکستان وەک بازاڕە سەرەکییەکانی هاوردەکردنی نۆکی تورکی دەستنیشان کراون، ئەم دۆخە لە کاتێکدایە کە بازرگانیی نۆک لە ئاستی جیهانیدا رووبەڕووی ئاستەنگی رێڕەوەکانی دابینکردن و گۆڕانکارییەکانی بازاڕ بووەتەوە.
بەگوێرەی راپۆرتێکی تایبەت بە بازاڕی نۆکی تورکی، بڕی زیادەی بەرهەم کە بۆ هەناردەکردن ئامادەیە دەگاتە نزیکەی 180 هەزار تۆن، پێشبینی دەکرێت لەگەڵ نزیکبوونەوەی مانگی رەمەزاندا، خواست لەسەر بەرهەمەکە لە مانگەکانی داهاتوودا زیاتر بێت.
یوسف مەمییش، نوێنەری کۆمپانیای باشان ئاغڕۆ لەوبارەوە باسی کرد “ئاستی بەرهەمهێنانی نۆک لە تورکیا لە ساڵی 2026 مامناوەند بووە”، گوتیشی، کوالێتیی بەروبوومەکە زۆر باش بووە.
راپۆرتەکە ئاشکرای دەکات کە چین بازاڕی سەرەکیی هەناردەکردنی نۆکی تورکییە و عێراق و چەند وڵاتێکی دیکەش لە پلەکانی دواتر دێن، رێکارەکانی هەناردەکردن ئەو بڕانە دیاری دەکەن کە بۆ هەر کۆمپانیایەک بەردەستن، ئەمەش بەپێی تێکڕای هەناردەکردنیان لە پێنج ساڵی رابردوودا جێبەجێ دەکرێت.
نرخی نۆکی تورکی بەپێی قەبارەی دانەوێڵە و کوالێتییەکەی لە نێوان 600 بۆ 900 دۆلار بۆ هەر تۆنێک دەگۆڕێت، بازاڕە جیهانییەکان بەهۆی ئاستەنگی دابینکردن و رکابەرییەوە رووبەڕووی کێشە بوونەتەوە.
گۆڕانکارییەکانی بازاڕی تورکیا کاریگەریی راستەوخۆیان لەسەر بژاردەکانی هاوردەکردنی نۆک بۆ عێراق دەبێت. نرخی ناوخۆیی بەندە لەسەر تێچووی هاوردەکردن و گواستنەوە و ئاستی خواست لە بازاڕەکاندا.