بڕیارە بەم زووانە بانکی ناوەندیی عێراق دەست بکات بە خەرجکردنی دۆلاری ئەمریکی بە نرخی فەرمی بۆ گەشتیاران لە ڕێگەی فڕۆکەخانەی نێودەوڵەتیی هەولێرەوە، و ڕێکارەکانی ئەو پرۆسەیەش لە قۆناغی کۆتاییدان.
عەلی شێخ خالص بەرزنجی، ئەندامی لیژنەی گواستنەوە و گەیاندن و حوکمڕانی لە پەرلەمان رایگەیاند: “بەپێی بەدواداچوونەکانمان، بانکی ناوەندیی عێراق بەم زووانە بڕیاری پێدانی دۆلار بە نرخی فەرمی بە گەشتیاران لە فڕۆکەخانەی نێودەوڵەتیی هەولێر دەردەکات و ئامادەکاری و ڕێکارەکان گەیشتوونەتە قۆناغی کۆتایی جێبەجێکردن.”
ئەو پەرلەمانتارە ئاماژەی بەوەش کرد، پرۆسەکە بەپێی ڕێنمایی و میکانیزمەکانی بانکی ناوەندی دەبێت، بەمەش هاوشێوەی فڕۆکەخانەکانی دیکەی عێراق، لەمەودوا گەشتیارانی فڕۆکەخانەی هەولێریش دەتوانن پێش گەشتکردنیان پشکی دۆلار بە نرخی فەرمی وەربگرن.