کەشناسی: پلەکانی گەرما نزم دەبنەوە

بەڕێوەبەرایەتی گشتی کەشناسی و بوومەلەرزەزانی هەرێمی کوردستان، دواین پێشبینییەکانی کەشوهەوای بۆ ئەمڕۆ یەکشەممە و سبەی دووشەممە ڕاگەیاند، کە تێیدا ئاماژە بە لاوازبوونی شەپۆلی بارانبارین و هاتنی بارستە هەوایەکی سارد دەکات.

بەپێی ڕاپۆرتی کەشناسی، کاریگەری شەپۆلی بارانبارین لەسەر ناوچەکە لاواز بووە. کەشی ئەمڕۆ بە گشتی بەردەوام هەور دەبێت و لە زۆربەی ناوچەکان تەم دروست دەبێت کە تا کاتەکانی نیوەڕۆ کۆتایی دێت. لەگەڵ ئەوەشدا، پێشبینی چەند تاوە بارانێک لە کاتی جیا جیادا دەکرێت لە سەنتەری پارێزگاکان، ئیدارە سەربەخۆکان و ناوچە شاخاوییەکان، کە جۆری دابارینەکە بە شێوەی نمە باران و هەندێک کات بارانی مامناوەند دەبێت لەگەڵ ئەگەری دروستبوونی هەورە تریشقە بەتایبەت لە ناوچە شاخاوییەکاندا.

لە ئەنجامی کاریگەری بارستە هەوایەکی سارد، لە کاتەکانی شەودا پلەکانی گەرما زیاتر نزم دەبنەوە و ئەگەری بەفربارین لەسەر قەدپاڵی چیا بەرزە سنوورییەکان و لووتکەی شاخە بەرزەکان (کە بەرزییان لە ٢٦٠٠ مەتر زیاترە) هەیە، هاوکات لە شەودا کاریگەری شەپۆلی بارانبارین بە تەواوی کۆتایی دێت.

بۆ سبەی دووشەممە، کەشناسی پێشبینی دەکات لە کاتەکانی بەیانیدا تەم لە ناوچەی جیا جیا دروست ببێت، پاشان لە نیوەڕۆوە ئاسمان دەگۆڕێت بۆ نیمچە هەور. بەهۆی بەردەوامی کاریگەری بارستە هەوا ساردەکە، پلەکانی گەرما زیاتر نزم دەبنەوە (بە ٣ تا ٥ پلەی سیلیزی) و ئەگەری بەفربارین لەسەر لووتکە و قەدپاڵی هەندێک لە ناوچە شاخاوییە بەرزە سنوورییەکان بەردەوام دەبێت.