ئەندامێکی لێژنەی دارایی لە پەرلەمانی عێراق ڕایگەیاند: “بە دڵنیاییەوە مووچەی فەرمانبەرانی هەرێمی کوردستان بۆ ئەمساڵ و ساڵی داهاتووش مسۆگەرە.”
پەرلەمانتارێکی پارتیش دەڵێت: “هەرێمی كوردستان هەموو پابەندییەکانی خۆی جێبەجێ کردووە”
د. نەرمین مەعرووف، ئەندامی لێژنەی دارایی پەرلەمانی عێراق، ڕایگەیاند: “بەپێی یاسای بودجە و خشتەکانی بودجەی 2024 و بەپێی بڕیاری دادگای فیدڕاڵی، ناردنی مووچەی مووچەخۆران و فەرمانبەرانی هەرێمی کوردستان مسۆگەر کراوە.”
زیاتر گوتیشی: “لە هەر بڕەپارەیەك، كە بۆ هەرێمی كوردستان دەنێردرێت، پێشینە بۆ دابەشكردنی مووچەی فەرمانبەران و خانەنشینانە و سەرۆک وەزیرانیش پابەند کراوە بۆ ئەو پرسە.”
نەرمین مەعرووف جەختی کردەوە: “دادگای فیدراڵی بە پشتبەستن بە پرۆژەیاسای بودجە، سەرۆك وەزیرانی عێراقی پابەند كردووە بە ناردنی پارەی مووچەی فەرمانبەران و خانەنشینانی هەرێمی کوردستان، كە بە دڵنیاییەوە پرۆژەیاسای بودجە بۆ ئەمساڵ و ساڵی داهاتووش دەبێت، هاوكات لە ساڵی ڕابردوودا، پشكی هەرێمی کوردستان كە جێگیر كراوە، 12.67% دیاری كراوە، بۆ ئەمساڵ و ساڵی داهاتووش وەكوو خۆی دەمێنێتەوە.”
ئەوەشی خستە ڕوو: “وێڕای ناردنی مووچە، حکوومەتی فیدڕاڵی پابەند کراوە پشکی بودجەی وەبەرهێنان بۆ هەرێمی کوردستان بنێرێت.”
لای خۆیەوە شێروان دووبەردانی، ئەندامی فراكسیۆنی پارتی دیموكراتی كوردستان لە پەرلەمانی عێراق، رایگەیاند: “بەپێی بودجەی پەسندکراو، خەرجكردنی مووچەی فەرمانبەران و خانەنشینان پێشمەرگە و هێزە ئەمنییەكانی کوردستان بەردەوام دەبێت و پێویستە بودجەی تەواویش بۆ هەرێمی کوردستان خەرج بکرێت”
ئاماژەی بەوەش دا: “هەرێمی كوردستان هەموو پابەندییەکانی خۆی جێبەجێ کردووە و داهاتی بەشێکی ناوخۆشی بۆ دارایی فیدڕاڵ ناردووە.”
کۆی گشتیی بودجەی هەرێمی کوردستان بۆ ساڵی 2024، بریتییە لە 20 ترلیۆن و 910 ملیار و 463 ملیۆن و 950 هەزار دینارە.
شوان بەرزنجی