توێژەران و زانایان ڕایدەگەیەنن کە بەکارهێنانی خوێی دەوڵەمەندکراو بە پۆتاسیۆم دەتوانێت ساڵانە ڕێگری لە نزیکەی ٣ ملیۆن گیانلەدەستدان و ١٠ ملیۆن تووشبوون بە نەخۆشییەکانی دڵ و گورچیلە لە جیهاندا بکات، وەک ڕێگەچارەیەکی کەم‌تێچوو بۆ ڕووبەڕووبوونەوەی بەرزیی پەستانی خوێن.
توێژینەوەیەک بە سەرپەرشتیی توێژەرانی پەیمانگەی «جۆرج» بۆ تەندروستیی جیهانی لە ئوسترالیا لە ١٩٣ وڵاتدا ئەنجام دراوە، دەریخستووە کە ڕاگواستنی جیهانی بۆ خوێی دەوڵەمەندکراو بە پۆتاسیۆم دەتوانێت ساڵانە بەرگری لە ٢٫٩٦ ملیۆن گیانلەدەستدان و ١٠٫١٧ ملیۆن حاڵەتی نوێی نەخۆشییەکانی دڵ و گورچیلە بکات.
برۆس نیل، ئەندامی باڵای پەیمانگەکە، ڕایگەیاند کە بەکارهێنانی زیاد لە پێویستی سۆدیۆم و کەم وەرگرتنی پۆتاسیۆم هۆکاری سەرەکیی بەرزیی پەستانی خوێنن. ئەم خوێیە جێگرەوەیە بە جێگۆڕکێکردنی بەشێک لە کلۆریدی سۆدیۆم بە کلۆریدی پۆتاسیۆم کار دەکات و تام و شێوازی لێنانی تەواو لە خوێی ئاسایی دەچێت.
بەپێی ئامارەکان، تەنها جێگرتنەوەی خوێی چێشتخانەی ماڵان دەتوانێت ساڵانە ڕێگری لە ١٫٨٥ ملیۆن گیانلەدەستدان بکات.
شارەزایان هۆشداری دەدەن کە ئەو کەسانەی تووشبووی نەخۆشیی پێشکەوتووی گورچیلەن یان ئەو دەرمانانە دەخۆن کە پۆتاسیۆم بەرز دەکەنەوە، لەوانەیە تووشی مەترسیی (Hyperkalemia) ببن، بەڵام دەکرێت ئەم مەترسییە لە ڕێگەی هۆشیارکردنەوە و چاودێریی کلینیکییەوە بپۆشرێت.