ڕۆژی سێشەممە ٣٠ تەممووز، وەزارەتی خەزێنەی ئەمریکا سزای نوێی بەسەر پێنج کەس و حەوت دامەزراوەی بنکەکانیان لە ئێران، چین و هۆنگ کۆنگە بە هۆی ئاسانکاری بۆ بەرنامەی مووشەکی و فڕۆکەی بێفڕۆکەوانی کۆماری ئیسلامی سەپاند.
لە بەیاننامەی وەزارەتی خەزێنەی ئەمریکادا هاتووە ئەو کەس و دامەزراوانە پارچە و کەرەستەی پێویستیان بۆ بەرنامەکانی مووشەکی بالیستیک و فڕۆکەی بێفڕۆکەوانی کۆماری ئیسلامی دابین کردووە.
خێرایی‌پێوەر و ژیرۆسکۆپ بەشێکی سەرەکین کە لە ڕێگەی ئەو کەس و دامەزراوانەوە بۆ وەزارەتی بەرگریی کۆماری ئیسلامی دابین کراون.
لە ڕاگەیەندراوی وەزارەتی خەزێنەی ئەمریکادا هاتووە ئەو کەس و دامەزراوانە ئاسانکارییان بۆ کۆماری ئیسلامی کردووە بۆ دەستڕاگەیشتن بە کەرەستەی گرنگی پێویست بۆ بەرنامەی مووشەکی و فڕۆکەی بێفڕۆکەوان، فراوانکردنی چەک و هەروەها بۆ ناردنی بۆ بریکارەکانی لە ڕۆژهەڵاتی نێوەڕاست و ڕووسیا.
برایان نێڵسن، جێگری وەزیری خەزێنەی ئامریکا گوتی: فراوانکردنی بێباکانە‌ی بەرنامەی مووشەکی و فڕۆکەی بێفڕۆکەوانی کۆماری ئیسلامی دەتوانێت ببێتە هۆی ناسەقامگیری زیاتر و ژیانی خەڵکی مەدەنی چ لە ناوچەکە و چ لە ئاستی جیهانیدا دەخاتە مەترسییەوە.