ئەمڕۆ یەكشەممە 11/5/2025، مەسرور بارزانی، سەرۆكی حكوومەتی هەرێمی كوردستان، لەمیانی بەسەركردنەوەی پرۆژەی ڕووناكی لە پارێزگای دهۆك، بۆ مێدیاكان قسەی كرد و لەبارەی مووچەشەوە ڕایگەیاند: ئێمە لە هەوڵەكانمان بەردەوامین لەگەڵ حكوومەتی فیدراڵ بۆ ئەوەی داوای مافی خەڵكی كوردستان بكەین، سوپاسی خەڵكی كوردستان و فەرمانبەران دەكەین، كە تا ئێستە خۆڕاگر و زۆر پشودرێژ بوون، بەڵام پێویستە ئەوانیش بزانن تا ئێستە حكوومەتی فیدراڵ مووچەی نەناردووە و ئەوەی لەسەر حكوومەتی هەرێمی كوردستانە و ئەركیەتی، جێبەجێی كردووە، بەڵام ماوەتەوە حكوومەتی فیدراڵ پابەندییەكانی خۆی جێبەجێ بكا و هیوادارین پابەندییەكانی جێبەجێ بكەن و مووچە نەكەنە پرسێكی سیاسی و وەكوو فشار دژی هەرێمی كوردستان بەكاری نەهێنن. هیوادارین بە زووترین كات جێبەجێ بكرێ.