وەزارەتی کۆچی عێراق: پلانی گەڕانەوە لە کەمپی هۆلەوه سەرکەوتوو بوو

وەزارەتی کۆچ و کۆچبەرانی عێراق رایگەیاند کە ٢٣٠ خێزانی عێراقی لە کەمپی هۆل لە پارێزگای حەسەکەی سووریا، لە چوارچێوەی ٢٩ـەمین قۆناغدا گەڕێندراونەتەوە.

کەریم نووری، بریکاری وەزارەت راگەیاند: “وەزارەتەکەمان ٢٣٠ خێزانی لە کەمپی هۆل لە باکووری رۆژهەڵاتی سووریا گەڕاندووەتەوە، لە چوارچێوەی ٢٩ـەمین قۆناغدا، ئەمەش لە میانەی پلانی داخستنی ئەم کەمپەدایە کە مەترسی لەسەر عێراق و جیهان دروست دەکات و مانەوەی دانیشتووان لە کەمپەکەدا وەک بۆمبی تەوقیتکراو وایە.”

نووری دەڵێت: “پڕۆگرامی تێکەڵکردنەوه به کۆمەڵگه یارمەتیدەر بووە لە تێکەڵکردنی گەڕاوەکان و دڵنیابوون لە گەڕانەوەیان بۆ ناوچەکانی خۆیان و هیچ پێشێلکارییەکی ئەمنی تۆمار نەکراوە”، و روونی کردەوە کە “ژمارەی ئەو کەسانەی کە تا ئێستا لە کەمپەکە گەڕاونەتەوە گەیشتووەتە ١٦ هەزار کەس، کە ١٠ هەزاریان گەڕاونەتەوە بۆ ناوچەکانی خۆیان و ٦ هەزاری دیکەشیان هێشتا لە سەنتەری چارەسەری دەروونی جەدعەدان.”

نووری ئاماژەی بەوەشدا کە “عێراق هێشتا ٢١ کەمپی ئاوارەکانی هەیه کە ١٥ کەمپیان لە دهۆک و ٦ کەمپیان لە هەولێرن، و نزیکەی ٢٠ هەزار خێزان کە زۆربەیان خەڵکی شنگالن، تێیدا نیشتەجێن”، و جەختی کردەوە کە “وەزارەت بەردەوامە لە جێبەجێکردنی پڕۆگرامی حکومەت بۆ داخستنی کەمپەکان لەڕێگەی گەڕانەوەی خوازراوی ئاوارەکان بۆ ناوچەکانی خۆیان.”