کە ناکۆکییەکانی نێوان لوبنان و ئێران لە زنجیرەیەک لێدواندا گرژتر دەبن، یوسف ڕەجی، وەزیری دەرەوەی لوبنان، ڕۆژی چوارشەممە ڕەخنەی لە گوتەکانی ڕاوێژکاری باڵای عەلی خامنەیی، ڕێبەری کۆماری ئیسلامیی ئێران، گرت. ئەم ڕەخنانە دوای گوتەکانی ڕاوێژکارەکە دێن کە تێیدا گوتوویەتی “بوونی حزبوڵڵا لە ئاو و نان بۆ لوبنان پێویستترە”، ئەمەش دووپاتکردنەوەی داواکارییەکانی لوبنانی بۆ دەستتێوەرنەدانی ئێران لە کاروباری نێوخۆیی ئەم وڵاتە زیاتر کرد.
پێش چوار ڕۆژ لەمە، عەباس عەراقچی، وەزیری دەرەوەی ئێران، لە پەیامێکدا لە تۆڕی ئێکس (X) نووسیبووی، “ئێمە لە کاروباری ناوخۆیی لوبنان دەستتێوەردان ناکەین”. ئەو هەروەها گوتوویەتی کە هاوتا لوبنانییەکەی بۆ وتووێژ بانگهێشت دەکات و گوتیشی، “پێویستیمان بە وڵاتێکی سێیەم نییە”. بەڵام، ڕۆژی چوارشەممە، ٥ی ئازار (٢٦ی تشرینی دووەم)، عەلی ئەکبەر وەلایەتی، ڕاوێژکاری باڵای ڕێبەری کۆماری ئیسلامیی ئێران بۆ کاروباری نێودەوڵەتی، لە چاوپێکەوتنێکدا لەگەڵ ئاژانسی هەواڵیی تەسنیم گوتی، “ئەمڕۆ بوونی حزبوڵڵا لە ئاو و نان بۆ لوبنان پێویستترە” و دووپاتی کردەوە کە “ئێران پشتیوانی لە حزبوڵڵا و بەرەی بەرگری کردووە و دەی کات”.
لە کاردانەوە بەرانبەر ئەم گوتانە، یوسف ڕەجی، وەزیری دەرەوەی لوبنان، هەمان ڕۆژی چوارشەممە لە پەیامێکدا لە تۆڕی ئێکس (X) بۆ عەباس عەراقچی، هاوتا ئێرانییەکەی نووسیبووی: “ڕاستەوخۆ مەیلم بوو گوتەکانت قبووڵ بکەم کە ئێران لە کاروباری ناوخۆیی لوبنان دەستتێوەردان ناکات، تا ئەوەی ڕاوێژکاری ڕێبەرەکەت دەرکەوت و فێری کردین چی لە لوبنان ‘گرنگە’ و لە دەرئەنجامەکانی بێچەککردنی حزبوڵڵا ئاگاداری کردینەوە”. ڕەجی لە درێژەدا دووپاتی کردەوە: “لێرەدا ڕوون دە کەمەوە: ئەوەی بۆ ئێمە لە ئاو و نان گرنگترە، سەروەری، ئازادی، و سەربەخۆیی بڕیاری ناوخۆییمانە، دوور لە دروشمە ئایدۆلۆژییەکان و چوارچێوە هەرێمییە سنووربەزێنەکان کە وڵاتەکەمان وێران کردووە و بەردەوام زیاتر بەرەو لەنێوچوونمان دەبات”.
هەواڵی پێشوو