دوای ڕاگەیاندنی ڕێككەوتنی نێوان هەولێر و بەغدا بۆ هەناردەكردنی نەوت بە بۆریی كوردستان بۆ توركیا، فراكسیۆنی پارتی لە ئەنجوومەنی پارێزگای کەرکووک پەیامێكی بۆ ڕای هاووڵاتییانی و ڕای گشتیی كوردستان و عێراق بڵاو كردەوە و ڕایگەیاند، كە دەستخۆشی لە هەوڵە بەردەوامەكانی مەسرور بارزانی دەكەن، دڵنیان کە ئەم هەنگاوە دەبێتە مایەی خێر و خۆشی و باشتربوونی بژێویی ژیانی تەواوی خەڵکی کەرکووک بە هەموو پێکهاتەکانییەوە.
فراكسیۆنی پارتی دیموكراتی كوردستان لە ئەنجوومەنی پارێزگای کەرکووک ڕایگەیاند: “بەوپەڕی شانازی و پێزانینەوە، دەستخۆشییەکی گەرم لە هەوڵە دڵسۆزانە و بەردەوامەکانی ڕێزدار مەسرور بارزانی، سەرۆکی حکوومەتی هەرێمی کوردستان دەکەین، بەبۆنەی گەیشتن بە ڕێککەوتنی دووبارە هەناردەکردنەوەی نەوتی کەرکووک لە ڕێگای بۆرییەکانی هەرێمی کوردستانەوە، بەندەری جیهان.”
دەشڵێ: “ئەم ڕێککەوتنە کە بەرهەمی دیدگایەکی نیشتمانی و ئیرادەیەکی بەهێزی جەنابیانە، هەنگاوێکی ستراتیژییە بەرەو بوژانەوەی ئابووری و دابینکردنی سەقامگیریی بۆ شارەکەمان. ئێمە دڵنیاین کە ئەم هەنگاوە دەبێتە مایەی خێر و خۆشی و باشتربوونی بژێویی ژیانی تەواوی خەڵکی کەرکووک بە هەموو پێکهاتەکانییەوە و هەموو گەلی عێراقیش لێی سوودمەند دەبن.”
فراكسیۆنی پارتی لە ئەنجوومەنی پارێزگای کەرکووک دووپاتی دەکاتەوە کە “ئەم دەستکەوتە گەورەیە سەلمێنەری ئەوەیە کە پاراستنی بەرژەوەندییەکانی خەڵک و گەڕانەوەی مافە دەستوورییەکان هەمیشە لە کارە لە پێشینەکانی جەنابی سەرۆکی حکوومەت بووە.”