وەزارەتی هەواڵگریی ئێران ڕایگەیاندووە کە ٣٩ کەس لە پارێزگای تاران لە چوارچێوەی “هەڵمەتی پێشوەختە” دەستبەسەر کراون.
لە بەیاننامەیەکدا هاتووە، ئەم کەسانە وەک ئەندامان یان پەیوەندیداران بە تۆڕەکانی ئۆپەراسیۆنی و گرووپە چەکدارەکان ناسراون. بەپێی هەواڵەکە، ٢٧ کەس لەوانە بە ئەندامێتی لە دوو گرووپی چەکدار تۆمەتبار کراون.
هەروەها ڕاگەیەندراوە یەکێک لە دەستبەسەرکراوان هەوڵی داوە “خانەی ئۆپەراسیۆنی” لە پارێزگای سیستان و بەلوچستان دامەزرێنێت، بەڵام پێش جێبەجێکردن دەستگیر کراوە.
لە بەیاننامەکەدا ئاماژە بە دۆزینەوەی چەندین کەرەستە و ئامراز کراوە، لەوانە بۆمبی دەستکرد، چەک، ئامرازە پەیوەندییەکان و چەند سیستەمی ئینتەرنێتی مانگی.
بەپێی ئەم زانیارییانە، دوو کەس لە دەستبەسەرکراوان لە بوارە میدیاییەکاندا چالاک بوون و بە چالاکیی ڕاگەیاندنی تۆمەتبار کراون. هەروەها هەندێک لە تۆمەتباران بە دابینکردنی زانیاری دەربارەی شوێنی هێزە ئەمنییەکان و هەندێک تۆڕی میدیایی تۆمەتبار کراون.
