کۆماری ئیسلامی ڕایگەیاندووە میکانیزمێکی نوێی بۆ کۆنترۆڵکردنی تێپەڕبوونی کەشتییەکان لە گەرووی هورمزدا دەست پێ کردووە؛ ڕێڕەوێکی گرنگ کە بەشێکی زۆری بازرگانیی وزەی جیهانی پێدا تێدەپەڕێت.
بە گوێرەی ڕاپۆرتی میدیا حکوومەتییەکانی ئێران، لە چوارچێوەی ئەم میکانیزمەدا دەبێت هەموو کەشتییەکان پێش تێپەڕین لە گەرووەکە مۆڵەت وەربگرن. هەروەها بە گوتەی بەرپرسانی ئێرانی، ڕێوشوێنە نوێیەکان لە ڕێگەی ئیمەیڵەوە بە کۆمپانیاکانی کەشتیوانی ڕادەگەیەندرێن.
ئەم هەنگاوە لە کاتێکدا دێت ئاڵۆزییەکان لە ناوچەکەدا زیادیان کردووە و نیگەرانییەکان دەربارەی تەناهیی کەشتیوانی لەم ڕێڕەوەدا زیاتر بوونە.
هاوکات، بەرپرسێکی سەربازیی ئێرانی هۆشداریی داوە ئەگەر لە خاکی ئیماراتەوە هیچ هەنگاوێک دژی ئێران بنرێت، وەڵامێکی “کوشندە و پەشیمانکەرەوەیان” دەبێت. گوتەبێژی بارەگای ناوەندیی خاتەمی ئەنبیا ڕاپۆرتەکانی ئیماراتی دەربارەی هێرشە مووشەکی و درۆنییەکانی ئێران بۆ سەر ئەو وڵاتە ڕەت کردەوە و بە “بێبنەما” ناوی بردن.
لە ڕۆژانی ڕابردوودا، بەرپرسانی ئیماراتی باسیان لە بەرپەرچدانەوەی هەندێک هێرش کردبوو کە بۆ ئێران دەگەڕێنرانەوە؛ ئەو بانگەشانەی تاران ڕەتیان دەکاتەوە.
ئەم پەرەسەندنانە لە کاتێکدایە گەرووی هورمز وەک یەکێک لە گرنگترین ڕێڕەوەکانی گواستنەوەی نەوت و گازی جیهان، کەوتووەتە بەر ئاڵۆزییەکان و هەر جۆرە سنووردارکردن یان پێکدادانێک تێیدا دەتوانێت لێکەوتەی فراوانی بۆ بازاڕە جیهانییەکان هەبێت.