هەیبەت حەلبووسی، سەرۆکی ئەنجومەنی نوێنەرانی عێراق، ئەمڕۆ چوارشەممە ڕایگەیاند کە ئەنجومەنەکە لە ماوەی ئەمڕۆ یان سبەی پێنجشەممەدا، کارنامەی حکومەت لە لایەن عەلی زەیدی، سەرۆکوەزیرانی ڕاسپێردراوەوە وەردەگرێت.
بەپێی بەیاننامەی فەرمی پەرلەمان، لە دانیشتنی ژمارە ٢٣دا کە بە سەرۆکایەتی حەلبووسی بەڕێوەچوو، ئەم بڕیارانە دران:
١. کارنامەی حکومەت: حەلبووسی ئاماژەی بەوە کرد کارنامەکە دەگاتە پەرلەمان و بەسەر ئەنداماندا دابەش دەکرێت بۆ ئەوەی لێی بکۆڵنەوە پێش دانیشتنی دەنگدان.
٢. یاسای تەندروستی دەروونی: پەرلەمان خوێندنەوەی یەکەمی بۆ یاساکە کۆتایی پێ هێنا، کە ئامانج لێی بەرزکردنەوەی ئاستی خزمەتگوزارییە دەروونییەکان و پاراستنی مافی نەخۆشانە بەپێی ستانداردە نێودەوڵەتییەکان.
٣. زانکۆی زانیارییە ئەمنییەکان: خوێندنەوەی یەکەم بۆ یاسای دامەزراندنی “زانکۆی عێراق بۆ زانستە ئەمنییەکان” کرا، بە مەبەستی پێگەیاندنی کادیری زانستی و ئەمنی و هاوتەریببوونیان لەگەڵ گۆڕانکارییە تەکنەلۆژییەکان.
٤. یاسای کار: خوێندنەوەی یەکەم بۆ هەمواری یاسای کار (ژمارە ٣٧ی ساڵی ٢٠١٥) بۆ کاتێکی تر دواخرا.
٥. ڕاوێژی یاسایی: حەلبووسی داوای لە لێژنەی یاسایی کرد ڕای خۆیان بدەن لەسەر ئەوەی ئایا ئەندامانی “ئەنجومەنی ڕاژەی فیدراڵی” دەتوانن دەستبەکاربن پێش ئەوەی سوێندی دەستووری بخۆن.
هەواڵی پێشوو