فیلمی نوێی ستار وۆرز لوتکەی بۆکس ئۆفیسی ئەمریکا داگیردەکات

دوای 7 ساڵ دابڕان لە شاشە گەورەکان، کۆمپانیای دیزنی جیهانی “Star Wars”ی لە ڕێگەی فیلمی “The Mandalorian and Grogu” زیندوو کردەوە.

ئەم فیلمە لە یەکەم ڕۆژی نمایشکردنیدا لە ڕێوڕەسمی پشووی “Memorial Day” لە ئەمریکا، توانی پلەی یەکەمی بۆکس ئۆفیس بەدەستبهێنێت.

فیلمەکە تەنیا لە ڕۆژی هەینیدا بڕی 33 ملیۆن دۆلاری کۆکردەوە، ئەمەش نیشانەی ئەوەیە کە بینەران بەردەوام خولیای بینینی بەرهەمەکانی ئەم زنجیرەیەیان هەیە.

پێشبینییەکان لەو بڕوایەدان، داهاتی فیلمەکە لە کۆتایی هەفتەدا بگاتە نێوان 80 بۆ 100 ملیۆن دۆلار. ئەم ژمارانە نزیک بوون لە فیلمی “Solo: A Star Wars Story” کە لە ساڵی 2018 نمایشکرا، بەڵام جیاوازییەکە ئەوەیە کە فیلمە نوێیەکە وەک سەرکەوتنێکی باش سەیر دەکرێت.

هەر ئێستا فیلمی “The Mandalorian and Grogu” لە 4300 هۆڵی سینەما لە ئەمریکای باکوور نمایش دەکرێت و پێشوازییەکی گەرمی لێکراوە.

فیلمەکە لە دەرهێنانی جۆن فاڤرۆیە و باس لە سەرکێشییەکانی ڕاوچییەکی بەناوبانگ و هاوەڵە بچووکەکەی دەکات. ئەوان هەوڵدەدەن “Rotta the Hutt” ڕزگار بکەن کە کوڕی یەکێک لە سەرکردە گەورەکانی تاوانە.

لەم بەرهەمەدا ئەکتەرانی وەک پێدرۆ پاسکال، جێرێمی ئەلن وایت، سیگۆرنی ویڤەر و جۆنی کوین بەشدارن. شارەزایان لەو بڕوایەدان، ئەم فیلمە دەبێتە هۆی ئەوەی زنجیرەی “Star Wars” جارێکی دیکە بە بەهێزی بگەڕێتەوە ناو کایەی سینەمایی و فیلمی دیکەی لێ بەرهەم بهێنرێت.