پێدری گۆنزالێزی ئەستێرەی لاوی یانەی بەرشەلۆنە، لە لێدوانێکدا وەفای خۆی بۆ یانە کەتەلۆنییەکە دووپاتکردەوە و ئاماژەی بەوە کرد کە ئامانجی ئەوەیە بۆ ماوەیەکی درێژ لە یاریگای کامپ نۆ درێژە بە یارییکردن بدات و لە هەمان یانەش واز لە یارییکردن بهێنێت.
ناوبراو جەختی لەوە کردەوە کە بەرشەلۆنە بە هیچ شتێکی ئەم جیهانە ناگۆڕێتەوە و گرنگی بە هیچ ئۆفەرێکی دەرەکی نادات، چونکە هەرگیز بیر لە جێهێشتنی یانەی خەونەکانی ناکاتەوە.
پێدری باسی لە پەیوەندی مێژوویی خێزانەکەی بە یانەکەوە کرد و ڕایگەیاند باپیرەی یەکێک بووە لە دامەزرێنەرانی یانەی بەرشەلۆنە، بۆیە ئەو لە منداڵییەوە هاندەری یانەکەیە و شانازی بەوەوە دەکات کە ئێستا درێسی ئەم یانەیە دەپۆشێت.
سەرەڕای سووربوونی لەسەر مانەوە، ناوبراو رێزێکی زۆری بۆ سەرجەم ئەو یانانە دەربڕی کە هەوڵی گرێبەستکردن لەگەڵیدا دەدەن و سوپاسیان دەکات.
لە بەشێکی تری قسەکانیدا، پێدری ئاشکرای کرد کە دوو خەونی سەرەکی هەیە، یەکەمیان بردنەوەی نازناوی مۆندیالە لەگەڵ هەڵبژاردەی ئیسپانیا و دووەمیشیان بەدەستهێنانی نازناوی چامپیۆنز لیگە لەگەڵ یانەی بەرشەلۆنە.
لە کۆتاییشدا ئاماژەی بەوە دا کە کەسایەتییەکی رکابەری هەیە و حەز بە شکست ناکات تەنانەت لە یارییە
ئەلیکترۆنییەکانیشدا، بۆیە لە یاریگادا هەموو هەوڵێک دەدات بۆ ئەوەی زۆرترین یارمەتی هاوڕێکانی بدات و سەرکەوتن بەدەستبهێنن.