ماڵپەڕی “ئەکسیۆس” لە زاری دوو بەرپرسی ئەمریکییەوە ئاشکرای کرد کە دۆناڵد ترەمپ، سەرۆکی ئەمریکا، لە پەیوەندییەکی تەلەفۆنیدا هێرشێکی توندی کردووەتە سەر بنیامین نەتانیاهو، سەرۆک وەزیرانی ئیسرائیل.
بەپێی سەرچاوەکان، ترەمپ بە توندی نیگەران و تووڕەیە لە بەردەوامیی هێرشەکانی ئیسرائیل بۆ سەر لوبنان و حیزبوڵا، بەتایبەت دوای ئەوەی ئێران چەندین جار هەڕەشەی کشانەوەی لە دانوستانەکان کردووە بەهۆی ئەو هێرشانەوە.
لە دەقی پەیوەندییە تەلەفۆنییەکەدا، ترەمپ جەختی لەوە کردووەتەوە کە بەهۆی ئەم جۆرە ڕەفتارانەی سەرۆک وەزیرانی ئیسرائیلەوە، ئێستا ڕق و کینەی هەموو کەسێک بەرامبەر بە خودی نەتانیاهو و دەوڵەتی ئیسرائیل زیادی کردووە.
ئەم گرژییە نوێیەی نێوان ترەمپ و نەتانیاهو لە کاتێکدایە کە پێشتر پەیوەندییەکانیان بە نزیک و هاوپەیمانی باوەڕپێکراو دادەنرا، بەڵام پەرەسەندنی شەڕ لە لوبنان و کاریگەرییە نەرێنییەکانی لەسەر پرۆسەی دانوستانەکان، بووەتە هۆی دروستبوونی ئەم ناکۆکییە توندە لە نێوانیاندا.