فرماندەی ناوەندی هێزەکانی ئەمریکا (سێنتکۆم) ڕایگەیاند کە هێزەکانی ئەمریکا ڕۆژی شەممە دوو فرۆکەی بێ فڕۆکەوانی هێرشبەری ئێرانی خستووەتە خوارەوە، چونکە بە گوێرەی وتەی ئەو فرماندەییە، هەڕەشەیان بۆ سەر ئازادی هاتووچۆی دەریایی نێودەوڵەتی لە تەنگەی هورموز دروست کردبوو.
سێنتکۆم لە ڕاگەیەنراوێکدا لەسەر پلاتفۆرمی «ئێکس» وتی: «هێزەکانی ئەمریکا دوو فرۆکەی بێ فڕۆکەوانی هێرشبەری یەک ئاراستەی ئێرانیان خستە خوارەوە کە هەڕەشەیان بۆ هاتووچۆی دەریایی نێودەوڵەتی لە تەنگەی هورموز دروست کردبوو.
هەروەها جەختی کردەوە کە هێزەکانی ئەمریکا هەروا لە ئامادەباشیدان و ئامادەن بۆ بەرگری کردن لە هەر هێرشێک یان هەڵوێستێکی دوژمنانەی ئێران.
لە هەمان کاتدا، هێرشەکانی ئێران بۆ سەر کوەیت و بەحرەین دووبارە بوونەوە. تەهران بانگەشەی کرد کە ئامانجی ئەو هێرشانە بنکە سەربازییەکانی ئەمریکا بوون، سەرەڕای ئەوەی لە چەند ڕۆژی ڕابردوودا ئاماژە بە پێشکەوتنێکی هێواش لە گفتوگۆکانی نێوان واشنگتن و تەهران دەکرا.
لە پاش ئەوەی سوپای ئەمریکا ڕۆژی هەینی ڕاگەیاند چەند شوێنێکی ڕاداری چاودێری لە باشووری ئێران کردووەتە ئامانج، دوای خستنە خوارەوەی چوار فرۆکەی بێ فڕۆکەوانی ئێرانی، ئاگادارییەکان لە کوەیت و بەحرەین لێدرا و دەنگی تەقینەوەش لە هەردوو وڵاتەکە بیسترا.
لە لایەکی ترەوە، سوپای پاسداران ڕاگەیاند کە بە مووشەک «بنکەکانی دوژمن لە ناوچەکە»ی کردووەتە ئامانج، وەک وەڵامێک بۆ ئەوەی بە «داگیرکردنی ئەمریکی» بۆ دوو دوورگەی سیریک و قشم ناوی برد.