سەرۆکی کۆماری ئیسلامیی ئێران، مەسعود بزشکیان، ڕایگەیاند کە واڵاتەکەی لەگەڵ قەتەر گەیشتووە بە ڕێککەوتنێک بۆ هەڵگرتنی سزایی ٦ ملیار دۆلار لە کۆی ١٢ ملیار دۆلار سامانی ئێران کە لە قەتەر هەڵگیراون.
بەپێی ڕاگەیەنراوێک کە سەرۆکایەتی ئێران بڵاویکردەوە، بزشکیان وتی: «بەپێی ئەو ڕێککەوتنانەی کە گەیشتووین، ٦ ملیار دۆلار لە سامانی ئێران لە قەتەر لە بەستراوی دەردەکرێت و دەگەڕێندرێتەوە بۆ ناو واڵات.»
ئەو هەروەها ئاماژەی بەوە دا کە هەوڵەکان بەردەوامن بۆ گەڕاندنەوەی ٦ ملیار دۆلارەکەی تر.
لە هەمان کاتدا، سەرچاوەیەکی ئاگادار ئاشکرا کردووە کە ئەمریکا بە هاوکاری قەتەر کار لەسەر دامەزراندنی میکانیزمێک دەکات بۆ ئەوەی ئێران بتوانێت بەشێک لە سامانی سرکراوی خۆی بۆ کڕینی کاڵای مرۆیی بەکاربهێنێت.
هەروەها چاوەڕوان دەکرێت تیمە تەکنیکییەکانی ئێران و ئەمریکا، کە لەسەر جێبەجێکردنی یادداشتی تێگەیشتن کار دەکەن، لە چەند ڕۆژی داهاتوودا لە دوحە کۆببنەوە. بە پێی سەرچاوەکە، ناوەندەکانی ناوبژیوانی هێڵی پەیوەندیان دروست کردووە بۆ کەمکردنەوەی ئاڵۆزی لە ئەگەری ڕوودانی هەر پێکدادانێکدا.
لەو دانیشتنە تەکنیکییەدا، بابەتی دەروازەی هورمزیش باس دەکرێت، کە لە ڕۆژانی ڕابردوودا بووە هۆی گۆڕەپانی سەربازی لەنێوان ئێران و ئەمریکا و نزیک بوو ببێتە هۆی تێکچوونی ڕێککەوتنی وەستاندنی ئاگر و گفتوگۆکانی نێوان هەردوو لایەن.
لە لایەکی ترەوە، سەرۆکی ئەمریکا، دونالد ترەمپ، چەندین جار دووبارەی کردووەتەوە کە واشینگتۆن «هیچ پارەیەک» بە تاران نادات، و جەختی لەسەر ئەوە کردووەتەوە کە سامانی ئێران تەنها بۆ کڕینی بەرهەمی ئەمریکی بەکار دەهێندرێت. بەڵام دەسەڵاتدارانی ئێران ئەم قسانەیان ڕەت کردووەتەوە و دەڵێن ئازادن سامانی خۆیان بەو شێوەیەی دەیانەوێت بەکاربهێنن.