ئەحمەد کانی
لەدوای ڕووخانی ڕژێمی فاشیستی لە عێراق لە ٢٠٠٣ ەوە تا دەگاتە ئەمڕۆ وێڕای هەموو کەم و کوڕیەکان و ئەو خاڵە نەرێنیانەی بە بنەما و بێبنەما بەبەرۆکی حکومەتی هەرێمەوە هەڵدەواسرێت لە بەراووردێکی خێرادا لەنێوان حکومەتی عێراقی فیدڕاڵ و حکومەتی هەرێمی کوردستان لەسەردەمی هەموو کابینەکانی هەردوو حکومەتدا با ئەم چەند پرسیارە بە لێکدانەوەیێکی وورد و بێلایەنانە شڕۆڤە بکەین و وەلام بدەینەوە :
١- کامیان بودجە و میزانیە و پارەی زیاتری لەبەردەستبووە بۆ ئەوەی زیاتر پڕۆژەی خزمەتگوزاری پێشکەش بەهاوولاتیان بکات و وولات بەرەو پێشتر ببات ؟
٢- کامیان بەپێی توانا داراییەکانی پڕۆژەی خزمەتگوزاری زیاتری بۆ هاوولاتیان ئەنجام داوە ؟
٣- هەرێمی کوردستان و عێراقی فیدڕال بەبەراوورد بەسەردەمی بەعس و سەدام حسێن :
لەرووی ئاوەدانی و خزمەتگوزاری و پێشکەوتن بەهەموو لایەنەکانیانەوە کامیان پاشەکشەی کردووە و کامیان پێشکەوتنی بەخۆیەوە دیوە ؟ بۆنمونە
هەولێر و بەغدا
سلێمانی و موسڵ
دهۆك و بەسڕا
هەڵەبجە و کەربەلا
زاخۆ و کوت و بابل
ڕاپەڕین و دیوانیە
سۆران و سەماوە
گەرمیان و رومادی…. هتد .
لەسەردەمی سەدام حسێن و بەعس چۆن بوون ئێستا چۆنن ؟
٤-لەرووی ئیقلیمیەوە کامیان زیاتر بەربەرەکانی کراوەو هەوڵدراوە ڕێگای لێبگیرێت و ئاسۆی بەرتەسك بکرێتەوە و ڕەوڕەوەی پێشکەوتنی ڕابگیرێت و زۆر جار دەروازە سنوریەکانی لێداخراوە ؟
٥- لەسەر ئاستی نێو دەوڵەتی کامیان زیاتر بە ئەرێنی باسدەکرێن و قبوڵکراون و هێمای پرسیاریان لەسەر نیە ؟
٦- لەرووی ئاسایش و ئاسودەیی و پێکەوەژیان کامیان ئارام و ڕووگەی خەڵکن کامیان خەڵك بەحەزەرەوە ڕوویان تێدەکات ؟
٧- کامیان بۆهەموو عێراقیەکان بەهەموو نەتەوەکانیەوە ( تورکمان ، عەرەب ، کلدان ، سریان ، ئەرمەن ، ئاشوری ، صابئی ، کورد ) هەمیشە دەرگای والایەوە و پەناگایە بۆ هەموویان ؟
٨- ژینگەی گەندەڵی لە کایەی کامیاندا قوڵتر و قێزەوەنترە ؟
لەگەڵ ڕێزمان بۆ کەسانی دڵسۆز و نیشتیمانپەروەر کە لەهەردوو لادا دەیانەوێ خزمەتی وولات بکەن .
٩- لەرووی پەروەردە و خوێندنی بالا و تەندروستیەوە سەرەڕای هەموو کەم و کوڕیەکان کامیان باشترن ؟
لەڕووی پڕۆژەی خزمەتگوزاری ئاو ، کارەبا و ڕێگاوبان کامیان زیاتری پێشکەشکردووە ؟
١٠- لە رووی داهاتەوە کامیان شەفافترن ؟ ئایا کەس دەزانێ داهاتی عێراق چی بەسەردێت و هەرهەمووی داخلی بودجەی سالانەی عێراق دەکرێت یاتەنها بەشێکی ڕەمزی داهاتەکە داخلی بودجە دەکرێت ؟
١١- دوور لەمزایەدە و قسە هەڵبەستن نەوتی عێراق چیبەسەردێت ، چەندی بەقاچاغ دەبردرێت ، بەپێی محاصصە بەشی لایەنەکانی دەسەلات و نزیك لەدەسەلات لەم نەوتە چەندە کەبەهیچ جۆرێك ئەم بڕانە داخلی بودجەی عێراق ناکرێن ؟
١٢- کامیان بە عەقلیەتی دەوڵەت ئەجیندای فەرمانڕەوایی ئازادانەتر بەڕێوە دەبات و هەموو هەژمونێکی ئیقلیمی و دەرەکی ڕەتدەکاتەوە و کامیان ئیرادەی لەدەستداوەو ئەو بەرنامەیە جێبەجێدەکات کەبۆی دانراوەو موسەییەرەو ناتوانێت موخەییەر بێت ؟
١٣- ڕێژەی هەژاری لەسنوری کامیان زیاترە ؟
١٤ – لە رووی کاریزما و کەسایەتی هەڵکەوتنی خەبات و تێکۆشان و مێژوو ڕابردووی شکۆدار و پیاوی دەوڵەت بەڕێوەبردن کامیان شایستە و لێهاتوو لێوەشاوەترن ؟
١٥- لەسەر بنەمایێکی دروستی دەستوری و سیاسی و یاسایی و فەرمانڕەوایی دەبێت کامیان سکالا بکات ؟
١٦ – کامیان پەرۆشی جێبەجێکردنی تەواوی بڕگەکانی دەستورە و کامیان دەیانەوێ بەپێی بەرژەوەندی خۆی بڕگەکانی دەستور هەڵبژێرێ و ئەگەر پێی بکرێت دەستور دەخاتە ئەرشیفەوە ؟
کۆتا پرسیارم ئەوەیە هەموو کورد هەموو کوردستانیان بەووردی ئاوڕێك لەمێژووی نزیکمان بدەنەوە ، ئایا
ئەوانەی ئێستا لە عێراق بالادەستن و وولات بەڕێوە دەبەن چ جیاوازیەکیان لەوانەی پێشخۆیان هەیە بەتایبەتی سەدام حسێن بەرامبەر بەکورد و کوردستان ؟
ئایا ئەوانە کورد و کوردستانیانیان خۆش دەوێ و بەلام دژی حکومەتی هەرێمی کوردستانن چونکە پێیانوایە دەبێت حکومەتێکی باشتر لەکوردستان هەبێت بۆ ئەوەی زیاتر خزمەتی کوردستان بکات ؟
یا کوردستانیان بەشایانی ئەوە نابینن خاوەنی حکومەتی خۆیان بن ؟
باشە ئەگەر دژی گەندەڵین لەکوردستان بۆ بەربەرەکانی گەندەڵی لەعێراق ناکەن و گەندەڵە زەبەلاحەکانی خۆیان سزا نادەن ؟