ئێوارەی ئەمڕۆ پێنجشەممە، بە بۆنەی ڕۆژی جیهانیی موزیکەوە، کۆنسێرتێکی تایبەتی میوزیک و گۆرانی لە هۆڵی پێشەوا لە شاری هەولێر سازکرا.
ئەم چالاکییە هونەرییە بۆ بەرزڕاگرتنی ڕۆژی جیهانیی موزیک و وەک هەنگاوێک بۆ پەرەپێدانی زیاتری کولتوور و هونەری ڕەسەن ئامادەکرابوو، تێیدا ژمارەیەک لە هونەرمەندان و گۆرانیبێژان کۆمەڵێک بەرهەمی میوزیکی و ئاوازیان پێشکەش کرد، کە کەشێکی هونەری و کەلتووری بەجۆش و خرۆشی بۆ ئامادەبووان دروست کرد.
لە چالاکییەکەدا ئاماژە بە گرنگیی ڕۆژی جیهانیی موزیک کرا و جەخت لەسەر بەردەوامیدان بە چالاکییە هونەرییەکان و پشتگیریکردنی هونەرمەندان کرا، لە پێناو بەرزکردنەوەی ئاستی کولتووریی شاری هەولێر.
چالاکییەکە بە ئامادەبوونی هێمن قادر، جێگری پارێزگاری هەولێر، بەرپرسانی حکومی و حیزبی و ژمارەیەک لە کەسایەتییە بەرچاوەکانی بواری هونەر بەڕێوەچوو.
کۆنسێرتەکە بەشێک بوو لە بەرنامە و چالاکییە کولتوورییەکانی هەولێر بۆ یادکردنەوەی بۆنە جیهانییە هونەرییەکان و دەوڵەمەندکردنی نێوەندی موزیکی لە هەرێمی کوردستان.